‘Oxford University Press’ ka shpallur “rage bait” si Fjalën e Vitit 2025, pas një votimi publik me mbi 30 mijë pjesëmarrës. Termi përshkruan përmbajtje online të qëllimshme që nxit zemërim, ofendim ose debat, shpesh për të rritur ndërveprimin dhe trafikun në rrjetet sociale.
‘Rage bait’ është një evolucion i clickbait-it, me fokus specifik tek emocionet negative dhe polarizimi. Sipas ekspertëve të Oxford, përdorimi i tij është trefishuar vitin e fundit, duke reflektuar një ndryshim të qartë në mënyrën si interneti manipulon emocionet dhe sjelljen e përdoruesve.
Në një vit të mbushur me diskutime mbi shëndetin digjital, algoritmet dhe ndikimin e AI-së, fjala tregon sesi përmbajtja online jo vetëm informon, por edhe provokon dhe ndikon në reagimet emocionale të publikut. Zgjedhja e “rage bait” nënvizon rritjen e ndërgjegjësimit për manipulimin emocional online dhe sfidën që sjell kjo për kulturën digjitale moderne.
Fjala e Vitit nga Oxford është një traditë mbi dy dekada e vjetër, që synon të identifikojë shprehjet që pasqyrojnë më mirë debatet dhe shqetësimet shoqërore të një viti. Përzgjedhja bazohet në analiza të të dhënave gjuhësore, komente publike dhe një korpus prej 26 miliardë fjalësh.
Në tre vitet e fundit, procesi është hapur për votim publik. Kandidatët e këtij viti, “rage bait”, “aura farming” dhe “biohack” u prezantuan madje edhe me video dhe fushata online, duke simuluar një proces zgjedhor. Pas verifikimit final të linguistëve, “rage bait” doli fitues.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
