Nëse bisedat sipërfaqësore të lodhin dhe preferon qetësinë, ndoshta je introvert. Nëse energjizohesh nga njohjet e reja dhe turma, je ekstrovert. Por çfarë ndodh kur asnjëra nga këto etiketa nuk të përshkruan? Psikiatria moderne po prezanton një term të ri që po ngjall debat dhe kureshtje: “otroverti”.
Ky koncept është propozuar nga psikiatri Rami Kaminski, në librin e tij The Gift of Not Belonging, botuar në qershor 2025. Sipas tij, otrovertët janë njerëz që nuk përshtaten lehtë me kornizat klasike të personalitetit dhe nuk ndiejnë nevojën për t’u bërë pjesë e turmës. Fjala vjen nga spanjishtja “otro”, “tjetër”, dhe latinishtja “vert”,“të kthehesh”, duke përshkruar një orientim personaliteti që “kthehet larg grupit”.
“Nëse Jung e shihte introvertin dhe ekstrovertin si dy orientime bazë të personalitetit, unë e shoh otrovertin në të njëjtën mënyrë: si një tipar që nuk kërkon drejtimin e grupit,” shpjegon Kaminski.
Ndryshe nga introvertët dhe ekstrovertët, të cilët, pavarësisht ndryshimeve, mbeten thellësisht socialë, otroverti është një ‘i jashtëm’. Jo domosdoshmërisht i vetmuar apo antisocial, por dikush që nuk ndien përkatësi të plotë në grupet shoqërore. Dhe kjo, sipas autorit, nuk është aspak negative.
Në një shkrim për The Guardian, Kaminski, i cili identifikohet vetë si otrovert, thekson se vetëdija për këtë tipar mund të jetë çliruese:
“Na lejon t’i themi vetes ‘jo’ situatave që na krijojnë parehati, të ndërtojmë marrëdhënie më të thella me njerëzit e afërt dhe të pranojmë veten ashtu siç jemi.”
Kush janë otrovertët?
Zakonisht janë njerëz të ngrohtë dhe empatikë, që krijojnë lehtësisht lidhje të forta personale. Ata marrin energji nga bisedat e thella me miqtë e ngushtë, jo nga ambientet e mbushura me njerëz. Paradoksalisht, shumë prej tyre janë edhe mjaft popullorë, por nuk u intereson nëse “bëjnë pjesë” apo jo në një rreth të caktuar.
Otrovertët shpesh qëndrojnë larg strukturave formale si feja e organizuar, partitë politike, klubet apo ekipet sportive. Ata preferojnë të vlerësojnë çdo ide vetë, pa e pranuar automatikisht vetëm sepse është shumicë.
A je edhe ti një otrovert?
Psikiatri ka krijuar edhe një test online, por disa pyetje orientuese janë:
– Preferon të marrësh vendime pa kërkuar këshilla?
– Të duket e vështirë puna në grup?
– Ndihesh ndonjëherë i vetmuar edhe kur je mes njerëzve?
– I shmangesh ritualeve dhe zakoneve të përbashkëta?
– Ke një nevojë të fortë për liri dhe pavarësi?
– Të pëlqejnë më shumë pyetjet sesa përgjigjet?
Otroverti vjen si një kujtesë se të qenit “ndryshe” nuk është dobësi, por një formë tjetër e autenticitetit njerëzor.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
