Në epokën e rrjeteve sociale të mbushura me dieta të reja dhe udhëzime për jetesë të shëndetshme, është e lehtë të biesh në kurthin e obsesionit për ushqimin “e duhur”. Megjithatë, dëshira për një ushqyerje të shëndetshme mund të kalojë në një fazë problematike, duke u kthyer në një çrregullim psikologjik dhe fizik të njohur si ortoreksia — një fenomen në rritje, veçanërisht te të rinjtë, sipas raportimeve ndërkombëtare.
Ortoreksia është një fiksim i tepruar dhe obsesiv ndaj pastërtisë dhe përbërjes së ushqimit, që shpesh maskohet si kujdes ndaj vetes, por në realitet sjell dëmtime të thella emocionale dhe shëndetësore. Edhe pse nuk është përfshirë ende në manualin zyrtar të diagnozave, profesionistët e shëndetit e njohin si një formë serioze të çrregullimeve të të ushqyerit.
Dietologia Beth Auguste shpjegon se ortoreksia nuk është thjesht zgjedhje e ushqimit të shëndetshëm, por një fiksim i sëmurë me rregullat dhe pastërtinë e ushqimit. Disa prej shenjave dalluese përfshijnë kufizime ekstreme pa arsye mjekësore, ankth të theksuar kur shkelën “rregullat”, izolim social për shkak të kontrollit të rreptë mbi ushqimin, analizë të obsesionuar të përbërësve dhe ndjenja të thella faji kur konsumohen ushqime jashtë listës.
Lexo edhe: Si të vendosni kufij dhe të mbroni qetësinë tuaj kur ndiheni të mbingarkuar
Përtej ndikimit në trup, ortoreksia dëmton rëndë edhe jetën sociale dhe shëndetin mendor. Njerëzit me këtë çrregullim shpesh ndihen të vetmuar, të lodhur psikologjikisht dhe përballen me ankth apo depresion kronik.
Ndihma profesionale, si terapitë psikologjike dhe mbështetja dietologjike, janë thelbësore për trajtimin e ortoreksisë. Sa më shpejt të identifikohen shenjat, aq më e lehtë është rikuperimi. Ekspertët nxisin një qasje të balancuar dhe ‘mëshirë’ ndaj vetes, duke kujtuar se ushqyerja është një udhëtim i gjatë, jo një listë e ngurtë rregullash.
“Një copë ëmbëlsirë herë pas here nuk është kurrë një gabim, por një akt i shëndetshëm vetë-mirësie,” përfundon një specialist.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
