Kompania OpenAI ka njoftuar papritur se po i jep fund platformës së saj për gjenerimin e videove me inteligjencë artificiale, Sora. Ky vendim vjen vetëm gjashtë muaj pasi u lançua aplikacioni i pavarur, i cili u bë shumë shpejt popullor për krijimin dhe shpërndarjen e videove hiper-realiste.
Në një postim në rrjetin X, OpenAI falënderoi përdoruesit duke thënë: “Për të gjithë ata që krijuan me Sora, ndanë përmbajtje dhe ndërtuan komunitet rreth saj: faleminderit. Ajo që krijuat kishte rëndësi dhe e dimë që ky lajm është zhgënjyes.”
Sora u bë publike për herë të parë në fund të vitit 2024, por arriti vëmendje masive vetëm pas lançimit të versionit të dytë dhe aplikacionit në shtator. Brenda pak ditësh, aplikacioni arriti vendin e parë në App Store të Apple. Përdoruesit krijuan video nga më të ndryshmet, shpesh edhe absurde, si p.sh. Princesha Diana duke bërë parkour apo qen që drejtojnë makina.
Megjithatë, platforma u përball edhe me kritika të shumta për përmbajtje problematike, përfshirë video me elementë të dhunshëm apo racorë, përdorimin e personazheve të mbrojtur nga e drejta e autorit, deepfake dhe dezinformim.
Ajo që e bën këtë vendim edhe më të papritur është fakti që vetëm një ditë më parë OpenAI kishte publikuar një artikull ku fliste për përpjekjet për ta bërë Sora më të sigurt, sidomos për përdoruesit e rinj, duke shtuar kufizime për përmbajtje të dëmshme si materiale seksuale, propagandë terroriste apo promovim të vetëdëmtimit.
Lexo edhe:Amazon blen ”Fauna Robotics”, startup-in që krijon robotë për fëmijët
Mbyllja e Sora-s vjen gjithashtu vetëm tre muaj pasi OpenAI kishte nënshkruar një marrëveshje trevjeçare me The Walt Disney Company. Kjo marrëveshje do t’u lejonte përdoruesve të krijonin video duke përdorur më shumë se 200 personazhe të licencuar nga Disney, përfshirë ato nga Marvel, Pixar dhe Star Wars.
Pas këtij zhvillimi, Disney ka vendosur të tërhiqet nga bashkëpunimi. Në një deklaratë, kompania theksoi se respekton vendimin e OpenAI për të ndryshuar drejtimin strategjik dhe për t’u fokusuar në prioritete të tjera. Ajo shtoi gjithashtu se do të vazhdojë të eksplorojë mënyra të reja për të përdorur inteligjencën artificiale, duke respektuar të drejtat e autorit dhe krijuesve.
OpenAI ka bërë të ditur se së shpejti do të japë më shumë detaje mbi afatin e mbylljes së Sora-s, si dhe mënyrën se si përdoruesit mund të ruajnë videot që kanë krijuar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
