Ministrja e Arsimit, Besa Shahini në një komunikim online së bashku me ministren e Shëndetësisë, Ogerta Manastirliu bëri me dije se shkollat do të hapen në shtator, duke respektuar protokollet e caktuara anti-COVID.
Teksa prezantoi rezultatet e sondazhit të shpërndarë nga Ministria e Arsimit për prindërit dhe nxënësit, ministrja Shahini tha se 87 për qind e tyre mendojnë se nxënësit duhet të kthehen në shkollë. Vetëm 13 për qind ishin për vijimin e mësimit online.
Ministrja Shahini sqaroi se skenarët janë të ndryshëm varësi të shkollave ndërsa shtoi se mësimi do të bëhet me turne, në rastin e klasave me numër të madh nxënësish në mënyrë që të ruhet distancimi social.
“Ne kemi bërë një pilotim të shkollave. Ne mund të ruajmë shëndetin, duke i hapur shkollat me kujdes. Gjermania dhe Zvicra i hapën shkollat pa bërë shumë ndryshime pasi ato kanë klasa me numër të vogël nxënësish. Ne duam të hapim shkollat sipas specifikave, por duke i kombinuar me mësime që zhvillohen në kushte shtëpie”, tha ministrja.
Ajo kërkoi nga bashkitë që të nisin me përgatitjet për nisjen e vitit shkollor duke filluar nga pastrimi i ambienteve të shkollave e deri tek pajisja me mjetet e nevojshme higjieno-sanitare nga higjienizuesit tek maskat.
Ndërsa ministrja Manastirliu u shpreh: “Grupet tona të ekspertëve janë në komunikim për detajimin e protokolleve të sigurisë, për të garantuar kufizimin e përhapjes së virusit. Transmetimi i sëmundjes në shkolla është i rrallë dhe me masat e duhura, ka pak gjasa të jenë mjedise të shtimit të transmetimit të virusit.
Kemi eksperiencën e deritanishme me hapjen e çerdheve dhe kopshteve, ku ka pasur raste sporadike të infeksionit dhe jo shpërthime. Do të vijojmë të mbajmë të informuar qytetarët. Shëndeti vjen gjithmonë i pari”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
