Kërkesa në rritje për mjete të Inteligjencës Artificiale mund të çojë të ardhurat e Nvidia drejt një shifre marramendëse prej 1 trilion dollarësh brenda dy viteve të ardhshme, sipas CEO-së Jensen Huang. Kompania deklaroi se vala e Inteligjencës Artificiale mund të gjenerojë deri në 1 trilion dollarë porosi deri në vitin 2027, ndërsa prezantoi një gjeneratë të re çipash dhe teknologjish në konferencën e saj vjetore GTC. Duke folur në këtë event, Huang theksoi se kërkesa për fuqi llogaritëse po përshpejtohet vazhdimisht. Aksionet e kompanisë u rritën lehtë në tregtimin para hapjes së bursës pas njoftimeve.
Ndër risitë e prezantuara përfshihen gjysmëpërçues të rinj të ndërtuar me teknologjinë e startup-it Groq, si dhe plane për zhvillimin e çipave që do të përdoren në qendra të dhënash në hapësirë.
Sipas Nvidia-s, platformat e reja do të mundësojnë funksionimin e sistemeve të inteligjencës artificiale në orbitë, duke mbështetur analiza gjeohapësinore dhe operacione autonome në hapësirë.
Kompania ka qenë një nga përfitueset më të mëdha të bumit të AI-së, me të ardhurat që janë rritur nga 27 miliardë dollarë në vitin 2022 në 216 miliardë dollarë vitin e kaluar, duke e çuar vlerën e saj në rreth 4.5 trilionë dollarë.
Megjithatë, aksionet janë ftohur muajt e fundit, pasi kishin kaluar përkohësisht vlerën prej 5 trilionë dollarësh në tetor, mes shqetësimeve se entuziazmi për AI mund të jetë i ekzagjeruar.
Analistët theksojnë se Nvidia duhet të bindë investitorët se rritja e saj e shpejtë është e qëndrueshme, ndërsa konkurrenca po intensifikohet. Gjigantë teknologjikë si Google dhe Meta Platforms po zhvillojnë çipat e tyre të inteligjencës artificiale, ndërkohë që kufizimet e eksportit nga SHBA kanë reduktuar shitjet e Nvidia-s në Kinë.
Pavarësisht sfidave, kërkesa për çipat më të fundit Blackwell dhe Rubin mbetet e fortë. Nvidia po zgjerohet gjithashtu në fushën e çipave të “inference”, të cilët i lejojnë sistemet e AI të gjenerojnë përgjigje më efikase pas trajnimit, duke fuqizuar mjete si ChatGPT dhe Gemini.
“Momenti i ‘inference’ ka ardhur,” deklaroi Huang. Për të përforcuar këtë tranzicion, Nvidia ka arritur një marrëveshje shumë-miliardëshe me Groq, që përfshin edhe rekrutimin e inxhinierëve kryesorë të këtij startup-i.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
