Publikohet në Fletoren Zyrtare vendimi i qeverisë për ndërtimin e centralit gjenerues të energjisë elektrike fotovoltaike dhe veprave ndihmëse në digën e Qyrsaqit, HEC Vau i Dejës, Qarku Shkodër.
Referuar vendimit, centrali i energjisë fotovoltaike do të ketë një kapacitet të instaluar: 5.143 mwp.
Koha për ndërtimin dhe vënien në operim të parkut fotovoltaik do të jetë brenda 24 (njëzet e katër) muajve nga marrja e lejes së ndërtimit ndërsa vendndodhja e burimit gjenerues të energjisë është në digën e Qyrsaqit, HEC Vau i Dejës, qarku Shkodër.
Afati i miratimit të ndërtimit është 48 (dyzet e tetë) muaj.
Korporata Elektroenergjetike Shqiptare (KESH sh.a.) ka detyrimin që të paraqesë periodikisht, çdo 3 (tre) muaj, pranë Ministrisë së Infrastrukturës dhe Energjisë ose institucioneve të tjera të autorizuara prej saj, informacion mbi ecurinë e ndërtimit të centralit fotovoltaik.
Ky investim, synon të diversifikojë investimet në fushën e energjisë, një prioritet ky ndërkombëtar.
Pavarësisht burimeve të mëdha hidrike, Banka Botërore ka bërë thirrje në mënyrë të vazhdueshme për diversifikim të investimeve në fushën e energjisë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
