Duke filluar nga dita e enjte bizneset që do të kapen në shkelje me ligjin do të përballen me gjoba deri në 10 herë më të larta. Pas publikimit në Fletoren Zyrtare të ndryshimeve në ligjin “Për procedurat tatimore në Republikën e Shqipërisë” në datën 12 nëntor hyn në fuqi zyrtarisht zbatimi i tyre.
10 milionë lekë dhe rivlerësim të të ardhurave për një periudhë 6-mujore është gjoba për bizneset që shesin mallra me shumicë pa faturë tatimore. Me 500 mijë lekë gjobitet biznesi i vogël nëse nuk lëshon kupon tatimor.
Kush nuk deklaron pagën reale të punonjësve do të përballet me gjobë 500 mijë lekë dhe kallëzim penal, në rast se konstatohet për herë të dytë shkelja. Me 500 mijë lekë gjobiten ata biznese që nuk deklarojnë adresën dhe nuk afishojnë çmimet e mallrave.
Qytetarëve që nuk marrin kupon apo faturë tatimore për mallin e blerë, nga dita e enjte, u lind e drejta të mos kryejë transaksionin për vlerën e mallit ose shërbimit të ofruar. Që do të thotë edhe nesë ke bërë një porosi me telefon apo në mënyrë tjetër, kur shkon dhe gjen gati mallin për të cilin ke porositur, nëse nuk të jepet kupon apo faturë ke të drejtë të largohesh pa ia blerë. Me ligjin e ri bëhet konfiskim deri në 50% të xhiros nëse ke detyrime të papaguara tatimore.
Të gjithë tatimpaguesit që bëjnë vetëdeklarim të mallit që kanë gjendje pa dokumente tatimore brenda datës 31.12.2015, do të përjashtohen nga penalitetet, nëse kjo bëhet para se inspektorët tatimorë të konstatojnë shkeljet.
Me ndryshimet e sjella në ligj nga 1 prilli i vitit të ardhshëm, pikat e shumicës nuk do lejohet të shesin tek individët. Pavarësisht kundërshtimeve nga bizneset, ashpërsimet e gjobave në ligjin “Për procedurat tatimore” erdhën në kuadër të aksionit të nisur kundër informalitetit.
/Klan Tv/
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
