Krissy Cela emigroi drejt Britanisë së Madhe me familjen e saj kur ishte vetëm 14 vjeç në pjesën e pasme të një kamioni. Nuk e dinte as çfarë do të ndodhte, as sesi do të ishte jeta e saj e re. Dhe padyshim, aq më pak mund ta mendonte në ato momente se vite më vonë, emri do t’i shfaqej në listën e 30 sipërmarrësve më të suksesshëm nën moshën 30 vjeç për Europën nga Forbes.
Kristiana dhe shoku i vet i saj i palestrës ngritën në 2017-tën një biznes: një aplikacion, që më shumë në fokus kishte gratë dhe lidhej me kujdesin e treguar në raport me fitnesin dhe ushqimet, app EvolveYou, të cilit i shtohej dhe linja e veshjeve të saj të palestrës “Oner Active” me të ardhura vjetore që kalojnë 34 milionë dollarë. Një sukses që zor se mund të kalonte pa rënë në sy. Forbes e thekson në profilin e hartuar për dyshen se aplikacioni në fjalë numëron 80 mijë të regjistruar aktivë në muaj.
Krissy reagoi në rrjetet sociale duke kujtuar historinë e largimit të mundimshëm nga Shqipëria 20 vjet më parë. “Disa nga ju mund ta dinë dhe të tjerë ndoshta jo, por kjo nuk ndodhi brenda natës. Jam një femër refugjate që emigroi në Britani nga Shqipëria në pjesën e pasme të një kamioni me banane me familjen time. Shkela në palester pa pasur si synim që të rrisja një komunitet me 6 milionë gra anembanë botës. Jack dhe unë nisëm aplikacionin EvolveYou me shpresën që të ndihmonim gratë të ndërtojnë fuqi mendore dhe fizike”, thotë ajo.
Kur e nisi rrugëtimin e fitnesit, nuk kishte asnjë njohuri mbi palestrën qe e përshkruan si një lloj terapie për të rivendosur në shina jetën e saj. Këtë rrugëtim e dokumentoi hap pas hapi në Instagram, dhe kur njerëzit ia zbuluan talentin, ishte thjesht çështje kohe që potenciali i saj të kapte majat./ Forbes
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
