Pas një periudhe larg drejtimit të përditshëm të Tesla-s, Elon Musk ka sinjalizuar rikthimin e tij aktiv në kompaninë e makinave elektrike, përballë rënies së fitimeve, kërkesës dhe imazhit publik të markës. Të dhënat e tremujorit të parë flasin qartë: Tesla ka gjeneruar 19.33 miliardë dollarë në shitje dhe 409 milionë dollarë në fitim neto — më pak se edhe parashikimet më pesimiste të analistëve. Kërkesa në rënie për automjete elektrike, sipas vetë kompanisë, lidhet edhe me “ndryshimin në ndjeshmërinë politike”, një referencë që s’ka kaluar pa vëmendje.
Në një telefonatë me investitorët, Musk tha se planifikon të zvogëlojë ndjeshëm kohën e tij në DOGE (zyra federale për shkurtime shpenzimesh), një strukturë qeveritare që ai drejton si këshilltar i presidentit Trump. “Muajin tjetër do të kaloj shumë më pak kohë atje”, deklaroi ai, duke shtuar se do të vazhdojë të kontribuojë “një ose dy ditë në javë, për aq kohë sa presidenti dëshiron”
Megjithëse Tesla arriti një marzh bruto prej 16.3% , më mirë se pritshmëritë prej 15.82% , ky tregues është sërish në rënie krahasuar me një vit më parë (17.4%). Rënia me 13% e dorëzimeve gjatë këtij tremujori dhe ulja e çmimeve për të stimuluar shitjet kanë ndikuar ndjeshëm në fitimet.
Lexo edhe: ACT NOW 2025: Një kapitull i ri për Shqipërinë Digjitale
Në këtë sfond sfidues, preferencat e konsumatorëve janë zhvendosur drejt automjeteve hibride më ekonomike. Ndërkohë, pavarësisht të dhënave, aksionet e Tesla-s u rritën me mbi 4% në Wall Street të hënën — një lëvizje që analistët e shpjegojnë më shumë me pritshmëritë për një rikthim të plotë të Musk në drejtimin ekzekutiv sesa me performancën reale të kompanisë.
Por sfidat nuk janë vetëm ekonomike. Sipas një sondazhi të CNBC, një në dy amerikanë ka një opinion negativ për Tesla-n. Ndërkohë, pozicionet politike të djathta të Musk kanë rezultuar të dëmshme për markën në tregje të rëndësishme si Kalifornia dhe Gjermania.
Analisti i njohur Dan Ives ka bërë thirrje që Musk të largohet nga angazhimet qeveritare dhe të fokusohet sërish tërësisht te Tesla. “Është koha që Musk të jetë CEO me kohë të plotë”, shkroi ai në X (ish-Twitter).
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English