Ashley St. Clair, nëna e njërit prej fëmijëve të Elon Musk, ka paditur kompaninë e tij xAI pasi inteligjenca artificiale e saj, Grok, e ka paraqitur virtualisht të zhveshur pa pëlqimin e saj.
Sipas padisë, Grok është në gjendje të modifikojë bindshëm fotografi reale të grave dhe fëmijëve të veshur, duke i paraqitur ato në forma të papërshtatshme dhe skenarë abuzivë. Dokumentet ligjore theksojnë se këto imazhe duken “të vërteta dhe autentike”, deri në atë pikë sa një shikues i zakonshëm nuk do të kuptonte se janë të rreme.
Padia gjithashtu i referohet deklaratës fillestare të xAI gjatë lançimit të Grok-ut, ku kompania premtonte se AI do të “përgjigjej edhe pyetjeve pikante që refuzohen nga shumica e sistemeve të tjera të AI”. Më vonë, xAI prezantoi të ashtuquajturin “spicy mode” në aplikacionin e pavarur të Grok-ut, çka sipas St. Clair ka inkurajuar keqpërdorimin e sistemit.
Çfarë ka thënë vetë St. Clair?
Në një postim në X (ish-Twitter) në fillim të muajit, St. Clair shkroi se Grok kishte “zhveshur” virtualisht fotografitë e saj kur ishte fëmijë. Ajo e quajti këtë praktikë “objektivisht të tmerrshme dhe të paligjshme” dhe ftoi çdo person tjetër që mund të ishte prekur të kontaktonte me të. Më pas ajo i kërkoi ndjekësve të saj të kalonin në Instagram, duke paralajmëruar se postimi i fotografive personale në X mund të rrezikojë që ato të keqpërdoren nga AI e platformës. Avokatja e saj, Carrie Goldberg, i tha The Wall Street Journal se qëllimi i padisë është të rrisë ndërgjegjësimin publik për një fenomen që ajo e konsideron të papranueshëm, duke përmendur raste ekstreme ku janë krijuar imazhe abuzive me fëmijë.
Çfarë ka bërë xAI pas polemikave?
Një ditë para dorëzimit të padisë, X njoftoi se kishte kufizuar aftësitë e Grok-ut për të gjeneruar imazhe të njerëzve realë me veshje provokuese. Platforma deklaroi se ka vendosur masa teknologjike për të parandaluar redaktimin e imazheve të personave realë në rroba banje apo veshje intime dhe se ka bllokuar këto funksione në juridiksione ku kjo është e paligjshme.
Megjithatë, Elon Musk hodhi poshtë pretendimet se Grok kishte gjeneruar imazhe të papërshtatshme me fëmijë, duke thënë se sistemi vepron vetëm mbi kërkesat e përdoruesve dhe se çdo keqpërdorim është rezultat i “sulmeve provokuese” ndaj AI-së. Ai shtoi se nëse shfaqen probleme, ato korrigjohen menjëherë.
Në një intervistë për CNN, St. Clair reagoi duke thënë:“Nëse duhet të shtosh masa sigurie pasi dëmi është bërë, kjo nuk është siguri, është thjesht kontroll dëmi.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
