Forumi Ekonomik i Tiranës zhvillohet për herë të dytë në vend

Për herë të dytë u mbajt Forumi Ekonomik i Tiranës, i cili u zhvillua në praninë e një audience të lartë vendase dhe ndërkombëtare.Mes folësve, Ministrja e Financave Anila Denaj foli për vëmendjen e shtuar të qeverisë në lehtësimin e të bërit biznesin në vend dhe përmirësimin e klimës së biznesit. Këtë vëmendje të shtuar e tregon edhe krijimi i një ministrie të veçantë për Mbrojtjen e Sipërmarrjes, ndërsa dialogu me komunitetin e biznesit është forcuar ndjeshëm.

Presidenti i Dhomës Amerikane të Tregtisë Enio Jaço, mori pjesë në panelin e diskutimeve rreth zhvillimit të reformave, rastet për një qëndrueshmëri makro-fiskale dhe përmirësim i klimës së investimeve.

Lexo këtu: Mbahet në Tiranë Forumi i Biznesit Shqipëri – Poloni

Mes përfaqësuesve të lartë ishin edhe kryeministri Edi Rama, ambasadori i BE-së në Shqipëri, Luigi Soreca, përfaqësues të lartë të Misionit të Bankës Botërore në Shqipëri, përfaqësues vendas dhe të huaj të shoqatave dhe organizatave që mbrojnë interesat e investitorëve të huaj, drejtues ekzekutivë të kompanive prestigjioze ndërkombëtare që operojnë në Shqipëri, përfaqësues të tjerë të trupit diplomatik në Tiranë etj.

Jaço foli për klimën aktuale të të bërit biznes në Shqipëri dhe theksoi rëndësinë e krijimit të një ambienti më konkurrues dhe tërheqës për investimet e huaja. Sipas tij, tërheqja e investimeve është më e rëndësishme se kurrë për Shqipërinë.

“Investimet krijojnë tregje të reja pune, mundësi biznesi dhe rrisin konkurencën. Por, ato janë bërë edhe më kritike se kurrë, për arsye të reduktimit të pritshëm të 2 projekteve të mëdha TAP dhe Devoll – si dhe pasojave të tërmetit, i cili sipas reagimeve që ne kemi marrë nga anëtarët tanë do të ndikojë në uljen e shpenzimeve konsumatore si dhe reduktimin e të ardhurave” u shpreh ai.

Presidenti i Dhomës Amerikane ofroi gatishmërinë për të bashkëpunuar në një koalicion të gjerë organizatash, përfshirë partnerë ndërkombëtarë dhe qeverinë, në mënyrë që Reforma për Investimet të realizohet dhe Shqipëria, të ngjitet në vendin e parë në rajon për investimet e huaja.

Dhoma Amerikane e Tregtisë në Shqipëri është një organizatë private e biznesit e angazhuar për të ndihmuar në përmirësimin e klimës së biznesit në Shqipëri si dhe në përmirësimin e imazhit të biznesit shqiptar në tregjet amerikane dhe ndërkombëtare.

Nëse shohim renditjen krahasuar me vendet e rajonit:  Shqipëria është e 82-ta në botë, ndërkohë që të gjithë fqinjët tanë (përveç Bosnjës e cila ka kushte të tjera gjeopolitike) renditen ndjeshëm më lart. Mali i Zi renditet i 50-ti, Kosova e 57-ta, Serbia në vendin e 44, ndërsa Maqedonia e Veriut e 17-ta. Pra, është Serbia dhe Maqedonia e Veriut që kanë fituar konkurrencën rajonale për thithjen e investimeve të huaja. Këtu ne dështojmë.” tha Presidenti i AmCham.