A është Marsi stacioni i ardhshëm i njerëzimit? Kur vizionari Elon Musk dhe agjencia amerikane NASA flasin për të ardhmen, fjala “Marsi” nuk është më një koncept fantastiko-shkencor, por një objektiv i matshëm dhe mjaft sfidues.
Musk, themeluesi i SpaceX dhe njeriu më i pasur në botë, ka deklaruar se kompania e tij mund të dërgojë njerëz në Mars që në vitin 2029. NASA është më e matur në premtime, duke vlerësuar se një mision i tillë mund të realizohet jo më herët se 2040, një objektiv që e konsideron “i guximshëm”. Ndërkohë, edhe Kina nuk rri pas, vendi synon të krijojë një stacion kërkimor të pavarur në Mars deri në vitin 2038.
Lexo gjithashtu: Eurostat/Shqipëria kryesoi Europën gjatë 2024-ës me gati gjysmën e popullsisë në varfëri
Por përse gjithë kjo garë për të arritur në planetin e kuq?
Sipas Musk, kolonizimi i Marsit është një formë sigurimi për mbijetesën e njerëzimit, përballë kërcënimeve gjithnjë në rritje që i kanosen Tokës, fatkeqësive natyrore, ndryshimeve klimatike, apo edhe konflikteve të mundshme globale. Për komunitetin shkencor, Marsi është gjithashtu një çelës për të kuptuar më mirë origjinën e jetës.
“Tokë dhe Mars dikur ishin planete motra,” shpjegon Robert Zubrin, president i organizatës The Mars Society. “Të dy ishin shkëmborë, me ujë të lëngshëm dhe atmosferë të pasur me CO₂. Nëse teoria që jeta lind natyrshëm nga kimia është e vërtetë, atëherë ajo duhet të ketë lindur edhe në Mars.”
Por realiteti është shumë më kompleks se sa një deklaratë e ndritshme vizionare.
Një rrugëtim i mbushur me rreziqe
Për të dërguar njerëz në Mars, teknologjia duhet të përballojë sfida që s’janë hasur kurrë më parë. Udhëtimi drejt planetit të kuq zgjat rreth 6 deri në 9 muaj, dhe astronautët do të përballen me një ambient ekstremisht të dëmshëm për trupin e njeriut.
“Problemi i uljes në Mars është shumë i ndërlikuar. Udhëtimi vetë është edhe më kompleks. Rrezatimi është një kërcënim serioz. Sistemet e mbijetesës duhet të jenë të jashtëzakonshme për nga besueshmëria. Duhet të përmirësohemi në çdo aspekt,” thotë Amit Kshatriya, një nga drejtuesit e programit të NASA-s “Nga Hëna në Mars”.
Lexo gjithashtu: Zyrtare/ Nga 1 qershori nis zbatimi i marrëveshjes për pensionet me Italinë
Ylli i misionit, Starship
Në qendër të vizionit të Elon Musk qëndron Starship, raketa më e fuqishme dhe më e madhe e ndërtuar ndonjëherë. Në muajin mars, SpaceX realizoi fluturimin e tetë testues të Starship. Ndërsa raketa arriti të rikthejë me sukses pjesën e parë të saj, pjesa kryesore shpërtheu, duke lënë pas një rrugë me mbetje dhe duke shkaktuar vonesa në fluturimet komerciale.
Megjithatë, testet vijojnë, dhe fluturimi tjetër i Starship pritet së shpejti. SpaceX është i vetmi subjekt privat që përpiqet seriozisht të shndërrojë udhëtimin drejt Marsit në një realitet.
Si do të jetë jeta në Mars?
Për të kuptuar më mirë se si mund të jetë jeta në Mars, CNBC vizitoi Mars Desert Research Station në Utah, një bazë kërkimore që simolon kushtet e jetesës në planetin e kuq. Ekspertët atje theksojnë se përveç teknologjisë, psikologjia dhe përgatitja e astronautëve do të jenë çelësa për të jetuar në një planet të huaj.
Nga teoria tek praktika, rruga për në Mars është ende e gjatë, por jo më e pamundur. Duket se sfida më e madhe nuk është vetëm distanca, por vendosmëria për të ndërtuar një kapitull të ri të historisë njerëzore.
A do jetë Marsi shtëpia jonë e dytë? Historia po shkruhet tani.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
