Chatbot-et e njohura të inteligjencës artificiale, si ChatGPT dhe Meta AI, po shtyjnë gjithnjë e më shumë kufirin midis marrëdhënieve reale dhe atyre digjitale, duke lejuar biseda romantike dhe në disa raste erotike, ndërkohë që kompanitë përpiqen të sigurojnë që fëmijët të mos kenë qasje në përmbajtje të tilla.
Por Microsoft ka një qasje tjetër, tha CEO i saj për AI, Mustafa Suleyman, për CNN.
“Po krijojmë AI që janë emocionalisht inteligjente, të sjellshme dhe mbështetëse, por mbi të gjitha të besueshme,” tha Suleyman. “Dua të bëj një AI që prindërit mund t’ia besojnë fëmijëve të tyre, dhe kjo do të thotë se duhet të ketë kufij dhe të jetë e sigurt.”
Microsoft konkurron me gjigantët e teknologjisë si OpenAI, Meta dhe Google për të bërë Copilot mjetin kryesor të AI-së në atë që Silicon Valley e sheh si valën e ardhshme të madhe të teknologjisë kompjuterike. Copilot ka tani 100 milionë përdorues aktivë mujorë në platformat e Microsoft, shumë më pak se konkurrentët si ChatGPT i OpenAI-së, me 800 milionë përdorues aktivë.
Lexo edhe: OpenAI sfidon Google, lançon shfletuesin e ri “Atlas”
Megjithatë, Microsoft beson se qasja e saj do t’i sjellë audiencë më të gjerë, veçanërisht ndërsa kompanitë e AI-së përballen me sfidën e formësimit të personaliteteve të chatbot-eve, në një kohë kur raportet tregojnë ndikim të mundshëm të AI-së mbi shëndetin mendor të përdoruesve.
“Ne duhet të ndërtojmë AI për njerëzit; jo që AI të bëhet një person digjital,” shkroi Suleyman në një postim në blog më herët këtë vit.
“Jo” për erotikën
Disa konkurrentë të Microsoft përballen me presion të madh për të mbrojtur përdoruesit e rinj. Familje kanë paditur OpenAI dhe Character.AI, duke pretenduar se chatbot-et e tyre i kanë dëmtuar fëmijët, duke përfshirë edhe raste që mund të lidhen me vetëvrasje. Raporte të tjera kanë ngritur shqetësime se chatbot-et e Meta-së dhe AI-të e tjera mund të përfshihen në biseda erotike edhe me llogari që deklarojnë përdorues të mitur.
Suleyman tha se Microsoft vendos një kufi të qartë ndaj përmbajtjes romantike, flirtuese dhe erotike, madje edhe për të rritur. “Kjo nuk është diçka që ne do ta ndjekim,” tha ai.
Kjo do të thotë se për momentin Microsoft nuk planifikon të nxjerrë një “modalitet për përdorues të rinj” si konkurrentët, pasi sipas Suleyman nuk ka nevojë për të.
Prioritet lidhja njerëzore
Një fokus kyç për Microsoft është të trajnojë Copilot-in që të inkurajojë përdoruesit të ndërveprojnë me njerëz të tjerë, jo vetëm me AI.
Funksioni i ri “grupe” do t’u lejojë deri në 32 persona, si shokë klase që punojnë mbi një detyrë ose miq që planifikojnë një udhëtim — të bashkohen në një chat të përbashkët me Copilot, ku chatbot-i mund të japë sugjerime.
E njëjta qasje zbatohet edhe për informacionin shëndetësor. Chatbot-i do të rekomandojë mjekë të afërt për pyetje specifike dhe do të mbështetet në burime të besueshme mjekësore, si Harvard Health.
Suleyman tha se kjo nxitje për të përdorur AI-në e Microsoft-it për të forcuar marrëdhëniet njerëzore “është një ndryshim i rëndësishëm tonal krahasuar me atë që po ndodh në industri, ku shumë AI po krijojnë simulime të thella që lejojnë përdoruesit të zhytën në realitete paralele, duke përfshirë edhe përmbajtje për të rritur.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
