Microsoft dhe Meta raportuan fitime më të larta se pritshmëritë për tremujorin e parë të vitit, duke rritur ndjeshëm çmimet e aksioneve të tyre në tregtinë pas orarit zyrtar. Rezultatet tregojnë se kërkesa e fuqishme për inteligjencën artificiale (AI) po ndihmon gjigantët teknologjikë të përballojnë pasiguritë ekonomike të shkaktuara nga tarifat tregtare.
Aksionet e Microsoft u rritën me 7% ndërsa ato të Meta me 5.4% pas publikimit të rezultateve, duke dhënë një impuls pozitiv edhe për kontratat e së ardhmes në bursat amerikane. Kjo rritje pritet të ndihmojë Microsoft të rikuperojë të gjitha humbjet e këtij viti, ndërsa Meta mbetet ende 3.7% më poshtë në krahasim me fillimin e vitit.
Rritja e fuqishme e Azure në Microsoft
Biznesi kryesor i Microsoft në fushën e cloud-it — Azure dhe shërbimet e tjera të ngjashme — shënoi një rritje prej 33% krahasuar me një vit më parë, duke tejkaluar pritshmërinë prej 29%. Kjo ishte një përshpejtim krahasuar me 31% rritje në tremujorin e kaluar. Nga kjo rritje, 16% iu atribuua shërbimeve të bazuara në AI, duke u rritur nga 13% në tremujorin pararendës. CEO i Microsoft, Satya Nadella, theksoi: “Cloud dhe AI janë faktorë thelbësorë për çdo biznes që dëshiron të rrisë prodhimtarinë, të ulë kostot dhe të përshpejtojë rritjen.” Microsoft ka udhëhequr në fushën e AI falë investimeve prej dhjetëra miliardë dollarësh në OpenAI që nga fundi i vitit 2023. AI tashmë është integruar në paketën Office 365 dhe mjetet Copilot, ndërsa GitHub Copilot përdoret nga më shumë se 15 milionë përdorues — katërfish më shumë se një vit më parë. Amy Hood, zëvendëspresidente ekzekutive dhe drejtore financiare e Microsoft, deklaroi :“Kemi realizuar një tremujor të fuqishëm me të ardhura prej 42.4 miliardë dollarësh nga Microsoft Cloud, 20% më shumë në baza vjetore.” Të ardhurat totale arritën në 70.1 miliardë dollarë, një rritje prej 13% nga viti i kaluar. Fitimi për aksion (EPS) ishte 3.46 dollarë, që tejkaloi ndjeshëm pritshmërinë prej 3.22 dollarësh. Megjithatë, tarifat e reja të shpallura nga Trump në prill mund të sjellin sfida të mëvonshme për Microsoft, edhe pse shumica e tyre për vendet jashtë Kinës janë ulur në 10%. Kompania ka shkurtuar disa projekte globale të qendrave të të dhënave, por planifikon të investojë rreth 80 miliardë dollarë deri në fund të vitit fiskal 2025. Shpenzimet kapitale për tremujorin arritën në 21.4 miliardë dollarë, duke shënuar uljen e parë pas dy vitesh rritje të vazhdueshme.
Lexo edhe:Gen Z – Si e kanë ndryshuar peisazhin e tregut të punës në Shqipëri? Flet ekspertja Eljana Mete!
Meta rrit të ardhurat nga reklamat, mbështetur nga AI
Meta gjithashtu raportoi rezultate mbresëlënëse. Të ardhurat totale u rritën me 16% krahasuar me një vit më parë, duke arritur në 42.31 miliardë dollarë, mbi pritshmërinë e tregut prej 41.4 miliardë dollarësh. Fitimi për aksion u rrit me 35% në 6.43 dollarë, duke tejkaluar parashikimet për 5.28 dollarë. Reklamat përbënin 98% të shitjeve të përgjithshme të Meta, me të ardhura prej 41.39 miliardë dollarësh, gjithashtu mbi pritshmëritë. CEO i Meta, Mark Zuckerberg, tha: “Kemi pasur një fillim të fortë në një vit të rëndësishëm. Komuniteti ynë po vazhdon të rritet dhe biznesi po performon shumë mirë.” Meta po bën përparime në zhvillimin e syzeve inteligjente dhe produktit të vet AI, Meta AI, i cili ka arritur gati një miliard përdorues aktivë në muaj. Zuckerberg theksoi se Meta është pozicionuar mirë për të përballuar pasiguritë ekonomike. Kompania ka rritur parashikimet për investimet në infrastrukturën e AI. Shpenzimet kapitale pritet të arrijnë nga 64 miliardë deri në 72 miliardë dollarë gjatë vitit 2025, duke reflektuar investime shtesë në qendrat e të dhënave dhe pajisje. Megjithatë, Meta paralajmëroi se vendimi i fundit i Komisionit Europian mund të ndikojë negativisht në përvojën e përdoruesve dhe në të ardhurat nga Evropa që në tremujorin e tretë të këtij viti.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English