Autoriteti i Komunikimeve Elektronike dhe Postare (AKEP) ka hedhur në konsultim publik projektrregulloren “Për përcaktimin e metodologjisë për përllogaritjen e masës administrative me gjobë”, një dokument kyç që synon të standardizojë dhe strukturojë mënyrën se si vendosen sanksionet ndaj operatorëve të komunikimeve elektronike që shkelin ligjin.
Nga gjoba fikse, te gjoba mbi bazë xhiroje – modeli “GDPR”
Një nga risitë thelbësore të kësaj metodologjie është braktisja e gjobave fikse dhe kalimi drejt një sistemi sanksionimi të bazuar në qarkullimin vjetor bruto të subjektit, një model i ngjashëm me atë të përdorur nga Rregullorja Evropiane për Mbrojtjen e të Dhënave Personale (GDPR). Vetë AKEP argumenton se vendosja arbitrare e gjobave, pa një metodologji të qartë dhe të arsyetuar, i ekspozon vendimet administrative ndaj rrëzimit në gjykatë, duke dobësuar efektivitetin e mbikëqyrjes rregullatore.
Parimet bazë: proporcionalitet, efektivitet dhe parandalim
Projektrregullorja mbështetet mbi tri parime themelore: proporcionaliteti, që masa e gjobës të jetë në raport të drejtë me shkeljen; efektiviteti, që sanksioni të ketë ndikim real; efekti parandalues, për të dekurajuar përsëritjen e shkeljeve. Këto parime janë të njëjta me ato të Kodit Evropian të Komunikimeve Elektronike dhe synojnë të balancojnë elementin ekonomik me mbrojtjen e të drejtave themelore të subjekteve të inspektuara.
Lexo edhe:Cilat janë linjat ajrore evropiane që ofrojnë Starlink?
Kufijtë maksimalë të gjobave
Sipas projektrregullores, nivelet maksimale të gjobave lidhen drejtpërdrejt me të ardhurat vjetore nga aktiviteti i komunikimeve elektronike:
- deri në 3% të të ardhurave vjetore, por jo më shumë se 100 milionë lekë, për shkeljet më të rënda;
- deri në 2% të të ardhurave vjetore, por jo më shumë se 50 milionë lekë, për shkelje të kategorisë së dytë;
- deri në 1 milion lekë, për shkelje më të lehta;
- për subjektet në vitin e parë të aktivitetit, gjobat variojnë nga 1 deri në 50 milionë lekë, në mungesë të të dhënave financiare historike.
Katër faza për llogaritjen e gjobës
Metodologjia parashikon një proces të detajuar me katër faza:
Së pari, përcaktimi i nivelit maksimal referencial të gjobës, bazuar në nenin e shkelur dhe të ardhurat vjetore;
Së dyti, vlerësimi i shkeljes, duke e kategorizuar si të ulët, të mesme ose të lartë, me një diapazon nga 0% deri në 100% të nivelit maksimal;
Së treti, aplikimi i faktorëve rëndues dhe lehtësues, si përsëritja e shkeljes, bashkëpunimi me inspektorët apo korrigjimi vullnetar;
Së katërti, ekzekutimi vullnetar, ku parashikohet ulje 15% e gjobës nëse ajo paguhet brenda 30 ditëve nga njoftimi i vendimit.
Çfarë ndryshon për operatorët?
Në praktikë, kjo rregullore e re rrit parashikueshmërinë dhe transparencën për operatorët e tregut, por njëkohësisht forcon fuqinë ndëshkuese të AKEP, veçanërisht ndaj subjekteve me xhiro të lartë. Gjobat nuk do të jenë më simbolike, por të ndjeshme financiarisht.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
