Takimi i fundit i sezonit për klubin e librit “Bytes & Books” u zhvillua mbrëmjen e 9 korrikut në Tiranë, duke përmbyllur një cikël diskutimesh ku libri bëhet pikënisje për debat të thelluar dhe reflektim strategjik. Këtë herë, vëmendja ishte përqendruar tek një prej librave më të rëndësishëm të kohës moderne në fushën e teknologjisë dhe politikës globale: “Lufta për Çipin” nga autori Chris Miller.
Atmosfera e takimit ishte e gjallë dhe e mbushur me energji, ku pjesëmarrës të fushave të ndryshme, nga teknologjia, biznesi, ekonomia e deri tek politika – sollën këndvështrime të ndryshme mbi temën e nxehtë që trajton libri: gara globale për dominimin e mikroçipeve. Libri i Miller zbulon se kush kontrollon çipat, kontrollon ekonominë, ushtrinë dhe madje edhe politikën globale. Diskutimi u shtri përtej faqes së librit, në analiza të thella mbi marrëdhëniet SHBA-Kinë, sfidat e zinxhirëve të furnizimit dhe rolin gjithnjë e më strategjik të Tajvanit në ekonominë botërore.
Pjesëmarrësit e klubit nuk ngurruan të lidhin temat globale me realitetin shqiptar, duke sjellë pyetje të natyrshme si: “Çfarë do të thotë kjo luftë për vendet e vogla si Shqipëria?” Apo: “A mund të pozicionohemi ndryshe në këtë realitet të ri teknologjik?” U theksua nevoja për të ndërtuar kapacitete vendore në teknologji, për të stimuluar kërkimin dhe për të mbështetur iniciativat që lidhin Shqipërinë me rrjetet globale të inovacionit.
Lexo edhe:Kur teknologjia bëhet përgjegjësi! Rruga e Endri Matajt drejt suksesit në New York
Një nga bashkëthemeluesit e “Bytes & Books”, Geron Kamberi, e përmblodhi bukur qëllimin e këtij takimi: “Ky libër nuk është vetëm një histori për çipat. Është një paralajmërim për të gjithë ne që duam të jemi pjesë e së ardhmes dhe të kuptojmë se ku po shkon bota.” Ai shtoi se ky takim ishte kulmi i një sezoni ku librat nuk ishin thjesht për t’u lexuar, por për t’u kuptuar dhe diskutuar në thellësi.
Pas diskutimit, të ftuarit patën mundësi të rrjetëzohen, të shkëmbejnë ide e kontakte, duke kthyer çdo takim në një platformë ku lindin bashkëpunime të reja. Kjo qasje e veçantë është ajo që ka bërë “Bytes & Books” një prej nismave më interesante në kryeqytet për komunitetin e profesionistëve që duan të qëndrojnë përpara kohës.
Me këtë takim, sezoni i tretë i klubit mbyllet, por njëkohësisht hapet rruga për projekte të reja, libra të guximshëm dhe diskutime që sfidojnë mendimin konvencional.
Për lexuesit e BusinessMag.al, kjo nismë është më shumë se një klub libri, është një laborator mendimi, ku fjala dhe dija kthehen në mjete për të kuptuar botën dhe për të vepruar në të.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English