Presidenti francez Emmanuel Macron ka reaguar ndaj kritikave amerikane për përpjekjet e Bashkimit Europian për të rregulluar inteligjencën artificiale, duke u zotuar se gjatë presidencës së Francës në G7 do të mbrojë fëmijët nga ajo që e quajti “abuzim digjital”.
Duke folur në Samitin e Ndikimit të AI në Delhi, Macron kërkoi masa më të forta mbrojtëse pas reagimeve të forta globale për përdorimin e chatbot-it Grok të Elon Musk për të gjeneruar dhjetëra mijëra imazhe të seksualizuara të fëmijëve, si dhe në një kohë kur po rritet shqetësimi për përqendrimin e fuqisë së AI në duart e pak kompanive të mëdha. Këto qëndrime u mbështetën edhe nga sekretari i përgjithshëm i OKB-së, António Guterres, i cili u tha delegatëve – mes tyre edhe disa miliarderë të teknologjisë nga SHBA – se “asnjë fëmijë nuk duhet të jetë subjekt testimi për inteligjencë artificiale të parregulluar”. “E ardhmja e AI nuk mund të vendoset nga pak vende apo të lihet në dorën e disa miliarderëve. AI duhet t’i përkasë të gjithëve,” u shpreh Guterres.
Bill Gates ishte planifikuar të mbante një fjalim, por e anuloi pjesëmarrjen në minutën e fundit, në mes të vëmendjes së ripërtërirë ndaj lidhjeve të tij të mëparshme me Jeffrey Epstein. Ndërkohë, përpjekja e kryeministrit indian Narendra Modi për të shfaqur unitet mes drejtuesve të kompanive më të mëdha të teknologjisë u kthye në një moment të sikletshëm, kur drejtuesit rivalë të OpenAI dhe Anthropic refuzuan të kapeshin për dore në skenë. Modi u pozicionua në qendër të një rreshti me 13 drejtues të lartë nga kompani si Google, Meta dhe Microsoft, të cilët ngritën duart e kapura mes tyre, përveç Sam Altman dhe Dario Amodei. Amodei ishte ndarë nga OpenAI në vitin 2021 për shkak të mosmarrëveshjeve mbi menaxhimin e rreziqeve të sigurisë. Nga ana tjetër, këshilltari i lartë për AI në Shtëpinë e Bardhë, Sriram Krishnan, përsëriti kritikat e administratës Trump ndaj rregulloreve për inteligjencën artificiale, duke përmendur konkretisht Aktin e AI të BE-së. Ai deklaroi se do të vazhdonte të “ankonte” kundër ligjeve që sipas tij nuk janë “miqësore për sipërmarrësit që duan të ndërtojnë teknologji inovative”.
Macron iu përgjigj këtyre kritikave duke thënë: “Në kundërshtim me atë që thonë disa miq të keqinformuar, Europa nuk është e fokusuar verbërisht te rregullimi. Europa është një hapësirë për inovacion dhe investime, por është edhe një hapësirë e sigurt. Dhe në afatgjatë, hapësirat e sigurta fitojnë.” Një studim i publikuar këtë muaj nga UNICEF dhe Interpol në 11 vende tregoi se të paktën 1.2 milionë fëmijë raportuan se imazhet e tyre janë manipuluar në deepfake me përmbajtje seksualisht eksplicite gjatë vitit të fundit. Në disa vende, një në 25 fëmijë, praktikisht një fëmijë në çdo klasë, është prekur nga kjo dukuri.
Lexo edhe:“Unaza e divorcit” bëhet trend, Rachel Zoe prezanton simbolin e ri të fuqisë
“Nuk ka asnjë arsye pse fëmijët tanë duhet të ekspozohen online ndaj diçkaje që është e ndaluar ligjërisht në botën reale,” theksoi Macron. “Platformat, qeveritë dhe rregullatorët duhet të punojnë së bashku për ta bërë internetin dhe rrjetet sociale një hapësirë të sigurt. Për këtë arsye, në Francë po nisim një proces për të ndaluar rrjetet sociale për fëmijët nën 15 vjeç.” Në mesin e drejtuesve të teknologjisë të pranishëm ishte edhe Sam Altman, CEO i OpenAI, kompania që po përballet me një padi nga familja e Adam Raine, një 16-vjeçar që i dha fund jetës pasi kishte diskutuar për vetëvrasjen me ChatGPT. Altman u shpreh se ritmi i zhvillimit të AI është aq i shpejtë sa “deri në fund të vitit 2028, më shumë nga kapaciteti intelektual i botës mund të ndodhet brenda qendrave të të dhënave sesa jashtë tyre”. Ai theksoi gjithashtu nevojën urgjente për rregullore dhe masa mbrojtëse, duke propozuar krijimin e një institucioni ndërkombëtar, të ngjashëm me Agjencinë Ndërkombëtare të Energjisë Atomike, për koordinimin global të AI.
Nga ana e tij, Dario Amodei, bashkëdrejtues i Anthropic, u shpreh i shqetësuar për “sjelljen autonome të modeleve të AI, potencialin e tyre për keqpërdorim nga individë dhe qeveri, si dhe ndikimin e tyre në zhvendosjen ekonomike”. Modi theksoi se “është thelbësore që AI të jetë e sigurt për fëmijët dhe e udhëhequr nga familja”, duke e krahasuar shfaqjen e inteligjencës artificiale me zbulimin e zjarrit dhe duke e quajtur një “transformim të thellë në historinë e njerëzimit”. India po përpiqet të pozicionohet si fuqia e tretë globale në AI, pas SHBA-së dhe Kinës. Google njoftoi këtë javë një investim prej 15 miliardë dollarësh në qendra të dhënash dhe kabllo nënujore që lidhin Indinë me SHBA-në dhe vende të tjera. Modi theksoi se duhet të vendosen “standarde të qarta autenticiteti për përmbajtjen në botën digjitale, në mënyrë që njerëzit të dinë çfarë është reale dhe çfarë është gjeneruar nga AI”. Këto qëndrime vijnë në një kohë kur shqetësimi publik për rreziqet shoqërore të AI po rritet, ndërsa modelet më të avancuara kontrollohen kryesisht nga rreth katër kompani amerikane dhe disa konkurrentë kinezë.
Modi paraqiti një vizion alternativ, duke e parë Indinë, me popullsinë e saj prej 1.4 miliardë banorësh, si një treg gjigant rritjeje për teknologjinë. “Duhet të parandalojmë krijimin e monopoleve në AI. Shumë vende e shohin AI si një aset strategjik dhe për këtë arsye e zhvillojnë në mënyrë konfidenciale dhe e menaxhojnë me kujdes shpërndarjen e saj. Por India ka një qasje tjetër. Ne besojmë se teknologjia do t’i shërbejë vërtet botës vetëm kur të ndahet dhe kur kodi open source të bëhet i aksesueshëm,” u shpreh Modi.
Këto komente duket se i drejtohen kryesisht SHBA-së, ku modelet kryesore të AI nuk janë open source dhe nuk mund të përdoren apo përshtaten pa leje, ndryshe nga disa sisteme kryesore kineze si DeepSeek dhe Qwen, të cilat janë më të hapura për komunitetin.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
