Ministri i Financave Petrit Malaj, i pranishëm në Komisionin për Çështjet Ligjore dhe Administratën Publike, vuri theksin në domosdoshmërinë për të vendosur rregulla më të qarta në tregtinë online, një sektor që po rritet me shpejtësi dhe një pjesë e madhe prej tyre vijojnë të funksionojnë në mënyrë informale.
Gjatë gjalës së tij, Malaj bëri të ditur se ministria ka hartuar një projektligj të ri që synon të formalizojë të gjitha faqet që operojnë pa NIPT ose që nuk deklarojnë të ardhurat, duke i detyruar ato të publikojnë qartë informacionet bazë të aktivitetit.
Sipas draftit, AKEP do të ketë kompetencën të pezullojë aktivitetin e çdo subjekti që nuk respekton rregullat, duke vendosur kështu një standard të ri transparence dhe përgjegjshmërie në tregun digjital.
“Vendosim për herë të parë që bizneset online të publikojnë të dhënat e tyre, si emrin tregtar, NIPT-in, adresën e aktivitetit dhe elementë të tjerë informues. Kjo është një masë që e konsiderojmë të drejtë dhe në shërbim të konsumatorit. AKEP, nëse konstaton shkelje, do të ketë të drejtën të pezullojë aktivitetin e tyre. Me pak fjalë, tregu online nuk do të funksionojë më jashtë rregullave të lojës.”, tha ministri Malaj, teksa më tej theksoi se në të njëjtën linjë me formalizimin e sektorit online, qeveria po përshpejton edhe masat për reduktimin e përdorimit të parasë fizike.
Lexo edhe: Shqipëria çel sot Grupkapitullin e 5-të, çfarë do të thotë kjo për ekonominë!
Operatorët e turizmit dhe transportit do të detyrohen të pajisen me pajisje elektronike të pagesave deri më 30 maj të vitit të ardhshëm, ndërsa kufijtë për transaksionet me para në dorë do të shtrëngohen më tej.
Pagesat mes bizneseve do të lejohen deri në 100 mijë lekë, ndërsa shumat më të larta do të kryhen vetëm përmes bankave. Po ashtu, kufiri për shitjet me cash ndaj konsumatorëve do të mbetet 500 mijë lekë.
“Pjesa më e rëndësishme e kësaj nisme lidhet me reduktimin e përdorimit të parasë fizike. Bizneset do të kenë mundësi të kryejnë pagesa ndaj njëri-tjetrit deri në 100 mijë lekë, nga 150 mijë që ishte më parë, ndërsa çdo shumë mbi këtë kufi do të kryhet vetëm përmes bankave. Gjithashtu, bizneset do të lejohen të shesin tek konsumatorët mallra deri në 500 mijë lekë me pagesë cash. Deri më 30 maj të vitit të ardhshëm, operatorët në sektorin e transportit dhe turizmit duhet të jenë pajisur me mjetet e nevojshme për pagesa elektronike”, shtoi Malaj.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
