Sipërmarrësit janë gjithmonë në luftë me kohën. Midis menaxhimit të ekipit, trajnimit të punonjësve të rinj dhe zhvillimit të biznesit, shpesh duket sikur dita nuk ka mjaftueshëm orë për t’i bërë të gjitha. Por çfarë ndodh nëse mund të delegosh një pjesë të kësaj pune… dikujt që i beson plotësisht, një versioni virtual të vetvetes?
Kjo është vizioni i Delphi, një startup që krijon klone digjitale përmes inteligjencës artificiale. Ata trajnojnë modele të personalizuara AI mbi bazën e shkrimeve të individëve, paraqitjeve në video dhe podkaste, duke krijuar një “binjak digjital”. Ky klon mund të komunikojë me mesazhe, telefonata apo edhe video-thirrje. Aktualisht, Delphi ka rreth 1,600 klientë të abonuar.
Lexo gjithashtu: Çfarë po ndodh?! Përdoruesit e ChatGPT po bëhen deluzionalë!
Një prej përdoruesve më të njohur është Tyler Denk, themelues i platformës së shpejtë të lajmeve beehiiv. Ai së fundmi publikoi klonin e tij, të krijuar nga Delphi, dhe e bëri të disponueshëm falas për abonentët e Big Desk Energy (BDE), buletinit të tij personal. Në një postim në blog, Denk shpjegon se kloni, të cilin e quajti DenkBot, mund të bisedojë me tekst dhe zë, dhe është trajnuar mbi gjithçka që ai ka shkruar ndonjëherë, postime në rrjete sociale, intervista në podkaste dhe dokumente mbështetëse të beehiiv.
“Abonentët e BDE mund të përdorin DenkBot për të marrë këshilla të bazuara në përmbajtjen time, pa qenë nevoja të kërkojnë mes qindra postimesh,” shkroi Denk.
Një mjet i ri për liderët e biznesit
CEO dhe bashkëthemeluesi i Delphi, Dara Ladjevardian, thotë: “Shumë nga klientët tanë janë shkrimtarë që duan ta shkallëzojnë ekspertizën e tyre në mënyrë interaktive.” Një nga përdorimet më të mëdha të platformës është për drejtues biznesesh dhe CEO-t. Ata mund të ngarkojnë memo, prezantime dhe fjalime për të ndërtuar një klon që ruan zërin dhe njohuritë e tyre, duke e ofruar më pas si burim për ekipin, një ndihmës digjital për orientimin e punonjësve të rinj dhe për të mbajtur ekipet të harmonizuara me vizionin qëndror.
Ladjevardian shton se klonet AI ndihmojnë edhe në gjenerimin e klientëve potencialë. Vetë ai ka një klon të vetin, dhe sa herë që ky klon bisedon me një inxhinier AI ose dikë që identifikohet si influencues apo trajner, Ladjevardian merr një njoftim në kohë reale, një mënyrë e zgjuar për të identifikuar talente dhe klientë të rinj.
Lexo gjithashtu: Burger në 27 sekonda? Robotët po transformojnë fast food-in në Kaliforni!
Kontroll dhe siguri, një prioritet i lartë
Që prej themelimit në 2021, Delphi ka pasur një prioritet të qartë, minimizimin e “halucinimeve” të AI-së. Klientët mund të rregullojnë “shkallën e kreativitetit” të klonit të tyre, duke vendosur sa besnik duhet të jetë ndaj materialeve me të cilat është trajnuar. Me një nivel të ulët kreativiteti, kloni do të përgjigjet vetëm mbi bazën e të dhënave ekzistuese. Kur has në një pyetje që nuk mund ta zgjidhë, kloni njofton personin real për të ndërhyrë dhe përmirësuar përgjigjen.
Nëse kloni vendoset në një nivel më të lartë kreativiteti, ai tenton të imitojë stilin dhe logjikën e personit që përfaqëson. Çdo gabim potencial mund të korrigjohet më vonë nga përdoruesi, i cili gjithashtu mund t’i shtojë materiale të reja për ta përmirësuar më tej.
Një revolucion që sapo ka filluar
Denk, i cili është shfaqur në kopertinën e Inc. si pjesë e listës “Best in Business 2024”, beson se paradigma aktuale e kërkimeve manuale për informacion do të zëvendësohet shpejt nga zgjidhje si Delphi, që lejojnë përdoruesit të marrin përgjigje të drejtpërdrejta pa humbur kohë duke kërkuar nëpër postime dhe arkiva.
Edhe pse beehiiv nuk ka shpallur ende ndonjë partneritet formal me Delphi, është e lehtë të imagjinohet potenciali për krijuesit e buletineve, veçanërisht ata që ofrojnë këshilla dhe përmbajtje edukative.
Delphi nuk është e vetmja në këtë treg në rritje. Në fund të vitit 2024, MasterClass prezantoi platformën On Call, që lejon përdoruesit të bisedojnë me klone AI të instruktorëve të njohur si Mark Cuban dhe Gordon Ramsay. Madje edhe zinxhiri i kafeneve Le Pain Quotidien ka zhvilluar një klon AI të themeluesit të saj, Alain Coumont. Së fundmi, Google publikoi një studim mbi të ardhmen e kloneve AI kur homologët e tyre njerëzorë ndahen nga jeta, duke i përshkruar këto klone si “fantazma gjenerative”.
Në një epokë ku koha është gjithnjë më e çmuar, ndoshta ideja për të pasur një version digjital të vetvetes nuk është më thjesht një fantaz, por një avantazh real.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
