Presidentja e Bankës Qendrore Europiane, Christine Lagarde, ka lëshuar një paralajmërim të fortë për konkurrueshmërinë e Bashkimit Europian, duke i bërë thirrje Komisionit Europian të heqë sa më shpejt barrierat e brendshme tregtare sepse sipas saj, ato po ngufasin inovacionin, produktivitetin dhe investimet në bllokun europian.
Në një intervistë për Financial Times, Lagarde deklaroi se ekonomia e eurozonës ka treguar reziliencë përballë goditjeve gjeopolitike dhe ekonomike; megjithatë, theksoi se nevojiten reforma shumë më të thella strukturore, pasi politika monetare nuk mjafton për të çliruar potencialin e plotë të kontinentit.
“Ne jemi pranë potencialit tonë; por ende ka shumë për të bërë për të rritur produktivitetin në eurozonë”, u shpreh Lagarde.
Ajo i cilësoi barrierat e brendshme tregtare si “tarifa të vetëshkaktuara”, të cilat kufizojnë qarkullimin e mallrave dhe shërbimeve mes vendeve anëtare; një realitet që bie ndesh me konceptin e tregut të vetëm europian.
Sipas vlerësimeve të ECB-së, këto pengesa përkthehen në një tarifë efektive prej 110 për qind mbi shërbimet dhe 60 për qind mbi mallrat e tregtuara brenda BE-së; shifra që Lagarde i quajti “tronditëse”.
“Po kufizojmë qarkullimin e mallrave dhe shërbimeve mes shteteve që supozohet të funksionojnë si një treg unik; dhe këtë duhet ta rregullojmë menjëherë.”
Lexo edhe: Tirana Economic Forum: Investimet, eksportet dhe energjia e gjelbër në qendër të zhvillimit ekonomik
Lagarde paralajmëroi se ky fragmentim, i nxitur shpesh nga rregulla kombëtare që shkojnë përtej kërkesave të BE-së, po dëmton aftësinë e kontinentit për të konkurruar globalisht.
“Njerëzit kërkojnë të shtojnë gjithnjë e më shumë; të ‘stolisin’ gjithçka përtej asaj që kërkohet”, nënvizoi ajo.
Një “moment europian” përballë një krize ekzistenciale
Lagarde theksoi se Evropa ndodhet brenda një “krize ekzistenciale”, por njëkohësisht përballet me një mundësi historike.
“Besoj se jemi ende në mes të kësaj krize, por mendoj gjithashtu se ka një moment të euros dhe ndoshta një moment të Evropës”, tha ajo.
“Nëse jemi të mençur dhe të shpejtë për t’i adresuar këto çështje, mund ta kthejmë këtë moment në zgjidhje.”
Në qendër të këtij transformimi qëndron Bashkimi i Tregjeve të Kapitalit; një projekt i nisur prej vitesh dhe ende i papërfunduar; por i domosdoshëm për t’u dhënë inovatorëve europianë akses në financim brenda kontinentit dhe jo vetëm në SHBA.
“Gjithçka nis me financimin; ne kemi talent dhe inovatorë, por atyre u duhet kapital i mjaftueshëm”, theksoi Lagarde, duke kritikuar faktin që kursimet europiane vijojnë të largohen drejt tregjeve amerikane.
Lagarde u shpreh e hapur ndaj idesë së emetimit të përbashkët të bonove europiane; sidomos për mbrojtjen, duke e krahasuar me mekanizmin e përdorur gjatë pandemisë së COVID-19.
“E bëmë për COVID sepse ishte çështje mbijetese, mbrojtja është po aq emergjente”, tha ajo. Ndërkohë, propozimi i presidentit francez Emmanuel Macron për të zgjeruar mandatin e ECB-së për të përfshirë rritjen ekonomike, u prit me rezervë nga Lagarde, e cila theksoi se politika monetare nuk mund të zgjidhë barrierat strukturore.
“A do të ndryshonin këto barriera me norma të ulëta apo lehtësim sasior, jo”, u shpreh ajo.
Rezistencë nga shtetet anëtare
Lagarde pranoi se, pavarësisht momentit të favorshëm për reforma, disa shtete anëtare mbeten kundër një integrimi më të thellë.
“Do të ketë rezistencë nga shumë drejtime; nga njerëz që thonë: ‘ne jemi mirë aty ku jemi, mos na prekni’”, deklaroi ajo.
Mesazhi i Lagarde për Brukselin ishte i qartë: Koha për të vepruar është tani.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
