Korridori VIII, boshti lindje–perëndim që po riformaton lidhjet ekonomike dhe të sigurisë në Ballkan

Në Tiranë u zhvillua sot Ministeriali i Korridorit VIII, një takim i nivelit të lartë që mblodhi përfaqësues nga Shqipëria, Maqedonia e Veriut, Italia, Rumania dhe Bullgaria, me fokus avancimin e bashkëpunimit strategjik në fushën e ndërlidhjes, qëndrueshmërisë dhe integrimit rajonal.

Takimi u organizua nga Ministria për Evropën dhe Punët e Jashtme e Shqipërisë dhe u zhvillua në Pallatin e Brigadave, ku në qendër të diskutimeve ishte roli i Korridorit VIII si bosht strategjik lindje–perëndim për Evropën Juglindore, me ndikim në zhvillimin ekonomik, sigurinë dhe integrimin evropian.

Ministrja për Evropën dhe Punët e Jashtme, Elisa Spiropali, theksoi se Korridori VIII është një aset strategjik për ndërlidhjen dhe sigurinë evropiane, duke nënvizuar se Shqipëria është një nga nyjet më të besueshme të këtij projekti. Sipas saj, Korridori VIII nuk është vetëm një investim infrastrukturor, por një domosdoshmëri strategjike për tregtinë, zhvillimin ekonomik dhe ndërveprueshmërinë mes vendeve anëtare të NATO-s.

Nga ana e saj, ministrja e Shtetit për Sipërmarrjen dhe Klimën e Biznesit, Delina Ibrahimaj, e cilësoi Korridorin VIII si një instrument kyç për integrimin evropian, konkurrueshmërinë ekonomike dhe stabilitetin rajonal. Ajo vuri theksin te nevoja për ripozicionimin e tij në arkitekturën TEN-T dhe kalimin nga angazhimet politike në projekte konkrete, të financuara në mënyrë të qëndrueshme dhe të zbatuara me efikasitet. Ibrahimaj nënvizoi gjithashtu potencialin e Shqipërisë si nyjë lindje–perëndim dhe portë e Adriatikut, përmes zhvillimit të porteve, infrastrukturës rrugore dhe hekurudhore.

Lexo edhe:Shqiptarët ‘braktisin’ vendin pas pandemisë, 138 mijë ikje më shumë se kthime

Ministri i Punëve të Jashtme dhe Tregtisë së Jashtme i Maqedonisë së Veriut, Timço Mucunksi, deklaroi se Korridori VIII është një lidhje kyçe mes Adriatikut, Jonit dhe Detit të Zi, duke theksuar rëndësinë e tij jo vetëm për tregtinë dhe integrimin në tregun e përbashkët evropian, por edhe për lëvizshmërinë ushtarake dhe sigurinë e NATO-s. Sipas tij, korridori mund të shndërrohet edhe në një aks të rëndësishëm për ndërlidhjen energjetike dhe rritjen e rezistencës rajonale.

Zëvendëskryeministri dhe ministri i Punëve të Jashtme i Italisë, Antonio Tajani, u shpreh se Korridori VIII është thelbësor për tregtinë dhe sigurinë, duke e cilësuar përfundimin e tij si një prioritet strategjik edhe për lëvizshmërinë e NATO-s. Ai theksoi se për Italinë ky projekt është një zgjedhje politike dhe pjesë e strategjisë për forcimin e lidhjeve të Ballkanit me Evropën.

Përfaqësues nga Bullgaria dhe Rumania nënvizuan dimensionin politik, ekonomik dhe të sigurisë së Korridorit VIII, duke e cilësuar atë si një projekt që bashkon interesat strategjike të vendeve të rajonit dhe kontribuon në stabilitetin afatgjatë të Evropës Juglindore.

Në kuadër të ministerialit, u theksua nevoja për kalimin nga vizioni politik në investime konkrete, me fokus në financimin e projekteve prioritare, përmirësimin e infrastrukturës portuale, rrugore dhe hekurudhore, si dhe forcimin e bashkëpunimit ndërqeveritar. Diskutimet u zhvilluan në disa panele tematike, që trajtuan ndërlidhjen e qëndrueshme, dimensionin gjeopolitik të Korridorit VIII dhe mekanizmat e financimit.

Ministeriali u shoqërua edhe me një forum ekonomik me temë “Nga lidhja strategjike drejt rritjes ekonomike rajonale: potenciali ekonomik i Korridorit VIII”, duke synuar ta kthejë këtë projekt në një motor konkret të zhvillimit, tregtisë dhe integrimit rajonal.

ata