Koreja e Jugut ka miratuar zyrtarisht ligjin e parë gjithëpërfshirës në botë që rregullon përdorimin e sigurt të inteligjencës artificiale (AI), raportoi Yonhap News.
Ligji, i quajtur Akti Bazë për Zhvillimin e Inteligjencës Artificiale dhe Krijimin e një Baze Besueshmërie, ka hyrë tashmë në fuqi dhe synon të rrisë përgjegjësinë e kompanive dhe zhvilluesve të AI-së, veçanërisht në luftën kundër përmbajtjeve deepfake dhe dezinformimit të gjeneruar nga AI.
Sipas këtij akti, kompanitë që përdorin modele AI me rrezik të lartë, sisteme që mund të ndikojnë drejtpërdrejt në jetën e përditshme ose në sigurinë e njerëzve, janë të detyruara të informojnë përdoruesit se shërbimet e tyre bazohen në inteligjencë artificiale dhe të garantojnë masa të përshtatshme sigurie. Në këtë kategori përfshihen përdorimet e AI-së në procese punësimi, vlerësime kredish dhe dhënie këshillash mjekësore.
Po ashtu, çdo përmbajtje e krijuar nga AI duhet të jetë e shoqëruar me watermark, e cila tregon qartë se materiali është gjeneruar nga inteligjenca artificiale. “Vendosja e watermark-ut në përmbajtjet e krijuara nga AI është masa minimale mbrojtëse për të parandaluar pasojat negative të abuzimit me teknologjinë, siç janë deepfake-t,” u shpreh një zyrtar i Ministrisë së Shkencës.
Lexo edhe: Apple po punon për një AI Pin që pritet të lançohet në 2027
Ligji parashikon gjithashtu që kompanitë ndërkombëtare që operojnë në Korenë e Jugut duhet të emërojnë një përfaqësues lokal nëse plotësojnë një nga këto kritere: të ardhura vjetore globale prej të paktën 1 trilion won (rreth 680 milionë dollarë), shitje vendase mbi 10 miliardë won (6.8 milionë dollarë), ose mbi 1 milion përdorues ditorë në vend. Në këtë kategori përfshihen kompani si OpenAI dhe Google.
Shkeljet e ligjit dënohen me gjoba deri në 30 milionë won (rreth 20 mijë dollarë). Megjithatë, qeveria ka parashikuar një periudhë njëvjeçare tranzicioni përpara vendosjes së sanksioneve, me qëllim t’i japë sektorit privat kohë për t’u përshtatur me rregullat e reja.
Në kuadër të këtij akti, ministri i Shkencës është i detyruar të paraqesë çdo tre vjet një plan strategjik kombëtar, që synon njëkohësisht promovimin e industrisë së AI-së dhe garantimin e përdorimit të saj të sigurt dhe të besueshëm.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
