Konfindustria: të krijohet Ministria e Ekonomisë dhe Tregtisë

Konfindustria, me rastin e krijimit të qeverisë së re në Shtator 2021, kërkon rikrijimin e Ministrisë së  Ekonomisë dhe Tregtisë si portofol i vecantë i ndarë nga Ministria e Financave. Sa më  sipër kërkohet për të shmangur përplasjen e mprehtë të  interesave institucionale të  sotme në Ministrinë e Financave dhe Ekonomisë, me pasoja të rënda në prodhimin vendor.  Procesi i integrimit të Shqipërisë  në BE me kushtet shoqëruese të  politikave tregtare e bën edhe më të domosdoshme krijimin e Ministrisë së Ekonomisë dhe Tregtisë .

Bashkimi i derisotëm i ministrive të ekonomisë dhe financave ka qenë i paarsyeshëm, mekanik dhe jo profesional, duke prodhuar pasoja negative sidomos për industritë shqiptare dhe prodhimin vendor në përgjithësi. Në vendet në  zhvillim dhe me deficit të madh në favor të importeve, sikurse është edhe Shqipëria, vënia e politikave ekonomike dhe tregëtare si shtojca të politikave financiare praktikisht sjell vështirësimin deri në dështim të  cdo nisme për mbështetjen e prodhimit vendor. Shkaku është, se Ministria e Financave ka për synim rritjen me cdo kusht të të  ardhurave buxhetore në kohë sa më të shpejtë, duke mbështetur dhe nxitur në thelb importet. Politikat ekonomike në parim duhet të synojnë zhvillimin në afatgjatë të industrive dhe sektorëve prodhues.

Konfindustria, mbështetur në shqetësimet e sipërmarrjes ka kundërshtuar publikisht dhe ka lobuar kundër institucionalisht në mjaft raste të paraqitjes nga Ministria e Financave dhe Ekonomisë të nismave ligjore, që godasin industritë, duke favorizuar importuesit.

Lexo: Konfindustria: “Të merren masa për përmirësimin e rrugës dytësore të Zonës Industriale të Tiranës