Klubi i librit “Bytes & Books” diskutim për “Brezi i Ankthit”

Dje u zhvillua takimi i radhës i klubit të librit Bytes & Books, ku në qendër të diskutimit ishte libri “Brezi i Ankthit”.

Pjesëmarrësit analizuan me interes mënyrën se si teknologjia, smartphone-ët dhe rrjetet sociale po ndikojnë në mënyrë të drejtpërdrejtë tek të rinjtë, duke sjellë rritje të ndjeshme të ankthit, izolimit, vetmisë dhe krahasimit të vazhdueshëm social. U theksua se brezi i sotëm rritet në një mjedis shumë më kompleks emocional, ku presioni për t’u përshtatur dhe për të qenë “i pranishëm online” shpesh ndikon në vetëvlerësim dhe mirëqenie.

“Letërsia dhe psikologjia prej kohësh na paralajmërojnë: njeriu humbet veten kur humbet aftësinë për t’u përqendruar. Teknologjia, e pandalshme dhe hipnotike, po ua merr të rinjve këtë aftësi në mënyrë pothuaj të padukshme. Ne si prindër dhe si shoqëri kemi dështuar në një ekuilibër thelbësor: i kemi tepruar me frikën në botën reale dhe u kemi dhënë liri të pakufizuar në botën virtuale. Ky është paradoksi që ushqen ankthin e brezit të ri” , tha Albert Gjoka.

Diskutimi solli perspektiva të ndryshme mbi rolin e prindërve dhe mësuesve, duke nënvizuar rëndësinë e vendosjes së kufijve të shëndetshëm digjitalë dhe të edukimit për përdorim të ndërgjegjshëm të teknologjisë.

“Në themel, libri na kujton se një shoqëri që investon tek teknologjia duhet po aq të investojë tek shëndeti emocional. Përndryshe, do të prodhojmë një brez që e di çdo gjë për botën, por shumë pak për veten,” shprehet Geron Kamberi.

Lexo edhe:Bytes & Books rikthehet me librin “Brezi i Ankthit”

Libri u vlerësua si një thirrje e nevojshme për reflektim mbi efektet afatgjata të epokës digjitale në zhvillimin emocional të brezit të ri, ndërsa takimi krijoi një hapësirë të vlefshme dialogu, ku pjesëmarrësit ndanë përvoja personale, vëzhgime dhe ide për mënyrat se si shoqëria mund të mbështesë më mirë të rinjtë në navigimin e këtij realiteti të ri.