Në kuadër të Javës Globale të Sipërmarrjes, LiveME organizoi një event ku në qendër të bisedës ishin “Të vërtetat e sipërmarrjes”, me panelistët Faola Hodaj (Drejtoreshë e Inovacionit në Bashkinë Tiranë), Shkëlzen Marku (Drejtues i YSB Balkans), Erion Çuni (Themelues i Almotech) dhe Enea Erebara (Themelues i startup-it Onepas).
Pas një jave të dendur me evente të cilat patën në qendër hapat pozitivë të sipërmarrjes në Shqipëri, mundësitë e reja, aktivitetet e shtuara, sukseset e arritura etj, në LiveME zgjodhëm ta trajtonim ndryshe këtë javë. Diskutuam disa nga ngërçet që haset sot zhvillimi i shëndetshëm i sipërmarrjes në Shqipëri.
Ka një arsye pse ne nuk jemi të zhvilluar në nivelet e rajonit (as në nivelin e Kosovës), ka një arsye pse ne nuk kemi investitorë të mëdhenj, ka një arsye pse në aktivitetet e sipërmarrjes nuk dalin fytyra të reja me shumë potencial çdo vit, ka një arsye pse në Shqipëri ka njerëz që e shohin sipërmarrjen si një risk të madh në rastin më të mirë dhe si një hajdutëri në rastin më të keq (Mos u habisni!).
Një nga arsyet e forta që u diskutua me panelin, është mënyra se si jemi formuar dhe ndikimi i regjimit komunist. Faola tha se kjo mendësi i ka rezistuar kohës deri në ditët e sotme dhe ne vazhdojmë ende të notojmë në ujërat e tranzicionit. Shkëlzeni gjatë fjalës së tij tha se në Shqipëri nuk ka startup-e të investueshme që të mund të tërheqin investitorë të mëdhenj dhe nuk kanë potencial të madh për tu zhvilluar. Për sa kohë do ekzistojë fenomeni i “dua të quhem sipërmarrës”, “çfarë ideje të kem që të fitoj këto lekët” dhe “a ka ndonjë certifikatë ky trajnimi?”, nuk do bëjmë hapa pozitivë në këtë aspekt.
Ka një mungesë përgjegjshmërie nga sipërmarrësit e rinj dhe një mungesë këmbëngulje që i pengon ata të përparojnë dhe të nxjerrin në treg sipërmarrje të suksesshme. Dorëzohen që në dështimin e parë dhe nuk marrin guximin të provojnë përsëri. Çdo gjë që u jepet falas e marrin për të mirëqenë dhe nuk e shfrytëzojnë për tu rritur dhe ky bashkë me ato që përmenda më lart është një problem i madh.
Deri më sot kemi hedhur hapa pozitivë në ndërtimin e një ekosistemi sipërmarrjeje në Shqipëri dhe kemi patur progres të konsiderueshëm krahasuar me vite më parë, por kjo nuk mjafton. Jetojmë në një kohë ku situatat ndryshojnë shumë shpejt dhe që ne të bëhemi pjesë e tregut rajonal dhe global duhet të përshtatemi shpejt dhe të zhvillohemi.
Le të jetë ky artikull një problem, që ata sipërmarrës që do ta lexojnë të mundohen ta zgjidhin dhe ta kthejnë në një mundësi për veten dhe për të tjerët.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
