~3 minuta lexim
Këshilli i Ministrave ka miratuar sot një vendim të rëndësishëm për krijimin e Bankës Shqiptare të Zhvillimit, një institucion financiar që do të luajë një rol kyç në nxitjen e zhvillimit ekonomik të vendit. Kjo bankë do të mbështesë sektorët e nënfinancuar, duke siguruar fonde për infrastrukturën, ndërmarrjet e vogla dhe të mesme, si dhe për zhvillimin e eksporteve shqiptare.
Në një deklaratë për mediat, pas mbledhjes së qeverisë, ministrja e Shtetit për Sipërmarrjen dhe Klimën e Biznesit, Delina Ibrahimaj, sqaroi se ky institucion është krijuar duke u mbështetur në eksperiencat më të mira të institucioneve të ngjashme në Bashkimin Evropian.
“Banka Shqiptare e Zhvillimit ka për synim të financojë zhvillimin e infrastrukturës fizike dhe digjitale, të mbështesë ndërmarrjet e vogla dhe të mesme, të financojë projekte infrastrukturore dhe gjithashtu të mbështesë eksportet shqiptare”, tha Ibrahimaj.
Ministrja theksoi se ky institucion do të ofrojë mundësi të reja financiare për ata qytetarë që nuk janë shërbyer ende nga sektori bankar, si dhe për ata që jetojnë në zona rurale. Ajo theksoi gjithashtu se Banka do të ofrojë produkte kursimi që do të përdoren për zhvillimin ekonomik të vendit.
Draftligji për krijimin e Bankës Shqiptare të Zhvillimit është hartuar në bashkëpunim me “Cassa Depositi e Prestiti”, një institucion lider në BE për dhënien e financimeve dhe ka pasur rezultate të suksesshme në zhvillimin ekonomik të tregut italian. Ibrahimaj gjithashtu theksoi se banka do të bashkëpunojë me institucionet financiare ndërkombëtare të BE-së për të siguruar fonde të drejtuara drejt shteteve anëtare dhe vendeve të tjera që janë në procesin e anëtarësimit në BE.
Kjo iniciativë ka për qëllim rritjen e produktivitetit, konkurrueshmërisë dhe lehtësimin e hyrjes së produkteve dhe shërbimeve shqiptare në tregun e Bashkimit Evropian.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English