Kosova ka shënuar një hap të rëndësishëm në arenën ndërkombëtare, me njohjen e pavarësisë së saj nga Kenia, një shtet i rëndësishëm i kontinentit afrikan.
Zhvillimi është konfirmuar nga Behgjet Pacolli, ish-president dhe aktualisht kreu i Aleancës Kosova e Re, i cili ka njoftuar se kjo njohje vjen pas një pune të gjatë lobuese që ai ka udhëhequr që nga viti 2009. Përmes një postimi publik, ai ka përshkruar rrugëtimin shumëvjeçar të përpjekjeve diplomatike, ku theksoi angazhimin e tij të pandërprerë për të ndërtuar ura miqësie dhe bashkëpunimi me autoritetet keniane.
“Kam trokitur derë më derë, zyrë më zyrë, me një qëllim të vetëm, ta bëj të dëgjohet zëri dhe e drejta e popullit të Kosovës për liri, pavarësi dhe sovranitet”, shkruan Pacolli, duke përmendur edhe një takim me Presidentin kenian William Ruto, të cilin e vlerëson si një aleat të qëndrueshëm në këtë proces.
Lexo gjithashtu: “Pronar.al” – Startup-i shqiptar që po sfidon mënyrën tradicionale të shitjes së pronave
Presidenti Ruto, sipas tij, kishte premtuar mbështetje për Kosovën që në vitin 2016 dhe e kishte vizituar Prishtinën në vitin 2019. Ndër hapat e parë drejt njohjes ishte vendimi i vitit 2023 për njohjen e pasaportave të Kosovës nga ana e Kenias, një zhvillim që u cilësua në atë kohë si “moment historik”.
Sipas Pacollit, njohja formale e shtetit të Kosovës nga Kenia është shpallur në një ceremoni zyrtare, ku Presidenti Ruto ka deklaruar publikisht njohjen e pavarësisë së Kosovës.
Ky zhvillim pritet të japë shtysë të re në përpjekjet ndërkombëtare të Kosovës për njohje të reja dhe për forcimin e pozitës së saj në skenën globale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
