Ky tranzicion vjen pas suksesit të mëparshëm të iute Group në tenderin e hapur, të organizuar nga Fondi i Garancisë së Depozitave, për transferimin e një pjese të aktiveve dhe detyrimeve të depozitave nga RWS Bank. Deri më sot, iute Group ka rikapitalizuar iuteBank dhe ka kaluar me sukses inspektimin e Bankës Kombëtare të Ukrainës. Me konfirmimin se iuteBank përmbush të gjitha kërkesat rregullatore, Fondi i Garancisë së Depozitave përmbyll rolin e tij në këtë proces.
Pas përfundimit të periudhës së tranzicionit, iuteBank do të nisë operimin si një pjesëmarrës i rregullt në treg. Banka do të rifillojë ofrimin e shërbimeve bazë për klientët ekzistues, duke përfshirë depozitat, llogaritë rrjedhëse dhe pagesat e menjëhershme brenda vendit.
CEO i iute Group, Tarmo Sild, u shpreh se hyrja në tregun ukrainas si bankë operacionale përfaqëson një hap të rëndësishëm në zgjerimin e grupit. “Kalimi me sukses i inspektimit të Bankës Kombëtare të Ukrainës, përfundimi i procesit të tranzicionit dhe hyrja në treg si bankë operacionale shënojnë një moment të rëndësishëm për iuteBank në Ukrainë. Tashmë fokusi ynë është ndërtimi i një banke dixhitale që ofron shërbime financiare të përditshme për klientët në Ukrainë, me një ofertë të plotë dixhitale të planifikuar për fillimin e vitit 2027,” u shpreh Sild.
Ndërkohë, CEO i iuteBank, Arthur Muravitsky, theksoi se banka fillimisht do të fokusohet në sigurimin e një rikthimi të lehtë në operim për klientët ekzistues. Sipas tij, faza e radhës do të fokusohet në forcimin e qeverisjes korporative dhe strukturës drejtuese, zgjerimin e shërbimeve për klientët dhe përgatitjen për lançimin e aplikacionit celular të bankës, me funksionalitete për llogaritë dhe depozitat.
Lexo edhe: iute Group, grupi bankar dixhital nga Tallin publikon rezultatet e 2025
“Përfundimi i periudhës së tranzicionit i mundëson iuteBank të nisë operimin si një pjesëmarrës i rregullt në treg. Vlerësojmë bashkëpunimin me Fondin e Garancisë së Depozitave dhe Bankën Kombëtare të Ukrainës gjatë gjithë këtij procesi. Prioriteti ynë i menjëhershëm është rikthimi i shërbimeve bankare për klientët ekzistues. Në fazën e ardhshme, do të prezantojmë zgjidhje financiare dixhitale.”-u shpreh Muravitsky. CEO i iute Group theksoi gjithashtu se hyrja në tregun ukrainas pasqyron besimin afatgjatë të grupit në sektorin financiar të vendit dhe në të ardhmen e tij si pjesë e hapësirës ekonomike evropiane.
iute Group është një grup bankar dixhital i fokusuar në shërbimet e përditshme financiare në Evropën Juglindore. E themeluar në vitin 2008 dhe me seli në Estoni, iute u shërben klientëve në Shqipëri, Bullgari, Moldavi, Maqedoninë e Veriut dhe Ukrainë. Përmes aplikacionit Myiute dhe operacioneve të tij lokale, iute ofron shërbime financiare dixhitale duke përfshirë pagesat, banking, financimin dhe ndërmjetësimin në sigurime. Grupi iute financon operacionet e tij përmes kapitalit, depozitave dhe obligacioneve të siguruara të listuara në Tregun e Rregulluar të Bursës së Frankfurtit dhe Listën Kryesore të Nasdaq Baltic.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
