Projektet ambicioze të Jared Kushner, dhëndrit të ish-presidentit amerikan Donald Trump, në Ballkan po hasin pengesa serioze politike dhe institucionale. Fondi i tij i kapitalit privat, ”Affinity Partners”, u tërhoq këtë javë nga planet për ndërtimin e një hoteli luksoz në Beograd, pas protestave të vazhdueshme antiqeveritare dhe tensioneve politike që shoqëruan projektin.
Në kontrast, në Shqipëri, projekti për transformimin e ishullit të Sazanit në një resort luksoz me vlerë rreth 1.4 miliardë dollarë po ecën përpara, edhe pse vendi po përballet me një valë hetimesh për korrupsion që përfshijnë disa nga zyrtarët më të lartë të qeverisë.
Në Serbi, i ashtuquajturi “Trump Tower” në Beograd ishte promovuar si një investim kyç nga presidenti Aleksandar Vuçiç, i cili mbështeti ndryshime ligjore për të lehtësuar projektin. Megjithatë, protestat e forta publike dhe paditja e një zyrtari qeveritar të përfshirë në proces e detyruan ”Affinity” të tërhiqej. Vuçiç fajësoi aktivistët dhe e cilësoi projektin si një “mundësi të humbur”.
Në Shqipëri, investimi i Kushner-it shihet nga qeveria si një test për aftësinë e vendit për të tërhequr kapital të madh perëndimor. Autoritetet shqiptare argumentojnë se zhvillimi i Sazanit do të ndihmojë në transformimin e një zone të izoluar në një destinacion turistik konkurrues në Mesdhe.
Lexo edhe: Shqipëria po humbet popullsinë me ritme alarmante, shumë mbi mesataren e Rajonit
Bloomberg shkruan se klima politike në vend është tensionuar nga hetimet e SPAK ndaj projekteve madhore infrastrukturore në Vlorë, përfshirë Aeroportin Ndërkombëtar të Vlorës dhe një tunel autostrade. Së fundmi, SPAK kërkoi heqjen e imunitetit për Belinda Ballukun, zëvendëskryeministre dhe ministre e Infrastrukturës, ndërsa kryetari i Bashkisë së Tiranës, Erion Veliaj, është arrestuar nën akuza për korrupsion dhe pastrim parash.
Affinity Partners ka deklaruar se tërheqja nga Serbia “nuk ka asnjë ndikim” mbi projektin në Shqipëri. Zyrtarët shqiptarë këmbëngulin se resorti në Sazan nuk do të ndikohet nga hetimet në vazhdim.
Sipas Transparency International, Shqipëria renditet e 80-ta në indeksin e perceptimit të korrupsionit, më mirë se Serbia, por ende me sfida të theksuara. Analistët theksojnë se suksesi ose dështimi i projektit të Kushner-it mund të ketë ndikim të madh në reputacionin e Shqipërisë si destinacion për investime të huaja.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
