Inflacioni në Eurozonë ra në 1.7% në janar, niveli më i ulët që nga shtatori 2024 dhe poshtë objektivit 2% të Bankës Qendrore Europiane (BQE). Inflacioni bazë u zbut në 2.2%, ndërsa çmimet e energjisë pësuan një rënie të fortë.
Inflacioni në Eurozonë vijoi të zbutet në janar, duke shënuar nivelin më të ulët që nga shtatori 2024 dhe duke rënë nën objektivin afatmesëm të Bankës Qendrore Europiane.
Sipas një vlerësimi paraprak nga Eurostat, inflacioni vjetor në zonën euro u ul nga 2.0% në dhjetor, në përputhje me pritshmëritë e tregjeve.
Inflacioni bazë vijon rënien
Inflacioni bazë, që përjashton çmimet e paqëndrueshme të energjisë dhe ushqimeve zbriti nga 2.3% në 2.2% në bazë vjetore, niveli më i ulët që nga tetori 2021. Në bazë mujore, çmimet e konsumit ranë me 0.5%, tkurrja më e fortë që nga nëntori 2023.
Shërbimet regjistruan normën më të lartë vjetore, me 3.2%, por në rënie nga 3.4%. Ushqimet, alkooli dhe duhani shënuan një përshpejtim të lehtë në 2.7%. Mallrat industriale jo-energjetike patën një rritje modeste prej 0.4%, ndërsa çmimet e energjisë u rrëzuan me 4.1%, duke thelluar rënien nga -1.9% një muaj më parë.
Në bazë mujore, çmimet në të gjithë bllokun u tkurrën me 0.5% rënia më e madhe që nga nëntori 2023.
Inflacion i ulët në ekonomitë kryesore
Ndër ekonomitë më të mëdha të Eurozonës, inflacioni mbeti i përmbajtur. Gjermania regjistroi një normë vjetore të vlerësuar në 2.1%, në linjë me mesataren e Eurozonës, ndërsa Italia shënoi vetëm 1%, duke reflektuar kërkesën e dobët të brendshme.
Franca u dallua me një nivel prej vetëm 0.4%, më i ulëti në bllok, duke nënvizuar forcën e procesit të fundit të dezinflacionit. Sllovakia regjistroi normën më të lartë vjetore, me 4.2%.
Rënia e inflacionit pasqyron kërkesë të dobët
Për disa ekonomistë, rënia e inflacionit nuk është domosdoshmërisht një lajm vetëm pozitiv.
Joe Nellis, profesor emeritus dhe këshilltar ekonomik në MHA, paralajmëroi se trendi dezinflacionist nxitet pjesërisht nga kërkesa e dobët.
“Kjo nuk është domosdoshmërisht arsye për festë,” tha Nellis.
“Rritja e dobët ekonomike gjatë viteve të fundit ka frenuar kërkesën, duke ndihmuar në uljen e inflacionit.”
Ndërsa çmimet më të ulëta të energjisë kanë kontribuar në ngadalësim, inflacioni bazë mbetet më këmbëngulës — megjithëse momentumi i tij po zbutet dhe nuk po përshpejtohet sërish.
Me inflacionin tashmë pranë objektivit dhe rritjen ekonomike të zbehtë në pjesën më të madhe të bllokut, nuk ka arsye për shtrëngim të mëtejshëm të politikës monetare, shpjegon Nellis.
Për bizneset, mjedisi po bëhet më i parashikueshëm. Inflacioni pranë objektivit përmirëson dukshmërinë mbi kostot dhe çmimet, ndërsa kostot e huamarrjes — edhe pse ende të larta krahasuar me periudhën para pandemisë — kanë rënë nga kulmet e mëparshme dhe mund të lehtësohen më tej gjatë vitit 2026.
Lexo edhe:“Vrasja” e The Washington Post!
Kërkesa konsumatore, megjithatë, pritet të rikuperohet gradualisht, teksa të ardhurat reale rimëkëmben.
Çfarë do të bëjë BQE-ja më tej?
BQE-ja pritet t’i mbajë normat e interesit të pandryshuara në mbledhjen e parë të Këshillit Drejtues të këtij viti, të enjten.
Alexandre Strott, ekonomist në Goldman Sachs, tha se mbledhja e parë e vitit ka gjasa të jetë pa surpriza.
“Këshilli Drejtues ka gjasa të lërë normat dhe të gjithë parametrat e tjerë të politikës monetare të pandryshuar,” u shpreh ai, duke theksuar se të dhënat e fundit janë gjerësisht në përputhje me projeksionet e stafit dhe se politika aktuale shihet ende si e përshtatshme.
Presidentja e BQE-së, Christine Lagarde, pritet kështu të ritheksojë se politika monetare është në një “pozicion të mirë” për të gjashtën mbledhje radhazi.
Roman Ziruk, analist i lartë tregu në Ebury, tha se panorama e inflacionit tregon presione të përmbajtura mbi çmimet, me rreziqe në rritje që inflacioni të bjerë nën objektiv.
“Forcimi i shpejtë i euros ul çmimet e importeve në një masë jo të papërfillshme,” tha Ziruk, duke shtuar se kjo dëmton gjithashtu konkurrueshmërinë e eksporteve — një kanal kyç për ekonominë e Eurozonës.
Si rezultat, tregjet që vetëm disa javë më parë anonin drejt një rritjeje të normave, tani shohin një probabilitet një në pesë për një ulje përpara fundit të vitit.
Ruben Segura-Cayuela, ekonomist në Bank of America, pret që BQE-ja të mbetet e kujdesshme.
“Nëse pasiguria ishte një faktor kyç për qasjen e kujdesshme të Lagarde në dhjetor, ajo vetëm është rritur që atëherë,” tha ai.
Bank of America vijon të presë një ulje prej 25 pikësh bazë në mars 2026, që do të ishte ulja e fundit e ciklit lehtësues, e ndjekur nga një periudhë e gjatë stabiliteti gjatë viteve 2026 dhe 2027.
Reagimi i tregjeve mbetet i zbehtë
Tregjet financiare reaguan pak ndaj të dhënave. Euro qëndroi e qëndrueshme rreth nivelit 1.18 kundrejt dollarit, ndërsa yield-et e bonove gjermane Bund mbetën pothuajse të pandryshuara në 2.88%.
Aksionet në Eurozonë shënuan një rritje të lehtë, me Euro STOXX 50 në rritje prej 0.3%.
Indekset kombëtare u shfaqën të përziera, por në territor pozitiv: DAX-i gjerman u rrit me 0.06%, CAC 40 francez u ngjit me 0.74%, ndërsa FTSE MIB i Italisë fitoi 0.69%.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
