Në 1 qershor fillon një fazë tjetër me masa lehtësuese përsa i përket COVID-19. Nga sot, nuk do të ketë më zona të kuqe apo të gjelbra, që përkthehet në liri-dalje pa kufizime orari, në të gjithë territorin e Shqipërisë.
Gjithashtu, në 1 qershor, në ditën që u dedikohet atyre, fëmijët e vegjël do të shkojnë në kopshte dhe çerdhe, pas më shumë se 2 muaj të mbyllur në shtëpi. Siç autoritet përkatëse kanë bërë me dije, ambientet e kopshteve dhe çerdheve janë dezinfektuar dhe do të funksionojnë në rregulla të rrepta sigurie. Me hapjen e kopshteve dhe çerdheve, do të hapen edhe parqet dhe këndet e lojërave.
Edhe kufijtë tokësorë do të hapen prej ditës së sotme. Është hequr edhe detyrimi i vetëkarantinimit, përveç rasteve kur vendoset nga autoritete shëndetësore. Sot hapen plazhet, që menaxhohen nga struktura akomoduese, hotelet. Ndërkohë, më 6 qershor do të hapen plazhet edhe për qytetarët, të cilët këtë sezon turistik do të kenë në dispozicion më shumë plazhe publike, ndryshe nga e kaluara.
Lexoni: Sezoni turistik do të zgjasë deri në nëntor
Edhe për sportdashësit ka lajme të mira, pasi do të nisë kampionati i futbollit, edhe pse do të duhet që emocionet e ndeshjeve t’i përjetojnë nga televizori pasi nuk do të lejohen që të ulen në shkallët e stadiumit për të parë skuadrën e tyre të zemrës, me qëllim shmangien e grumbullimeve masive të njerëzve.
Gjithashtu, ministrja e Shëndetësisë dhe Mbrojtjes Sociale, Ogerta Manastirliu ka njoftuar se prej 1 qershorit do të hapen palestrat, qendrat e internetit, kurset profesionale, edukative, argëtuese dhe konkurset e punësimit.
Lexoni: Nga 1 qershori do të lejohet lëvizja e automjeteve në të gjithë vendin
Megjithatë, teksa Shqipëria po hapet në masën 99%, nuk ka ende një vendim se kur do të hapet transporti publik, e ndërsa është planifikuar që hapja e pishinave, teatrove, kinemave, e klubeve të natës, mbajtja e konferencave dhe tubimeve të bëhet pas 23 qershorit.
Sa i përket dasmave, ato do të lejohen të zhvillohen, por me një numë të vogël pjesëmarrësish. I njëjti rregull do të zbatohet edhe për funeralet.
Ministria e Shëndetësisë ka ripërsëritur apelin për zbatimin e të gjitha masave të sigurisë duke u shprehur se“situata e epidemisë të shkaktuar nga COVID-19 nuk ka përfunduar”. Pamjet e qyteteve të boshatisura tashmë do i përkasin të kaluarës, pasi pritet që vendi t’i rikthehet normalitetit. Kujdesi ndaj COVID-19 tashmë është në dorën e qytetarëve.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
