Grupi i lobimit për teknologjinë CCIA Europe, anëtarë të së cilës janë gjigantët si Alphabet (Google), Meta (Facebook) dhe Apple, i ka bërë thirrje Bashkimit Evropian të pezullojë përkohësisht zbatimin e Aktit për Inteligjencën Artificiale (AI Act), duke paralajmëruar se një zbatim i nxituar i tij mund të rrezikojë ambiciet e Evropës për të qenë lider në fushën e inteligjencës artificiale.
Rregullorja historike e BE-së për inteligjencën artificiale hyri në fuqi në qershor të vitit të kaluar, me dispozita që parashikohen të zbatohen në mënyrë të fazuar. Ndër rregullat më të rëndësishme janë ato që lidhen me modelet e inteligjencës artificiale me përdorim të përgjithshëm (GPAI), të cilat pritet të hyjnë në fuqi më 2 gusht. Megjithatë, pjesë kyçe të udhëzimeve për GPAI, që duhej të publikoheshin më 2 maj, janë vonuar.
“Me pjesë kritike të Aktit që mungojnë vetëm disa javë përpara se të hyjnë në fuqi rregullat, na duhet një pauzë për ta bërë siç duhet këtë Akt – përndryshe rrezikojmë të ndalojmë inovacionin në tërësi,” tha Daniel Friedlaender, nënkryetar i lartë i CCIA Europe. Edhe liderë politikë, si Kryeministri suedez Ulf Kristersson, i kanë cilësuar rregullat për AI si “konfuze” dhe i kanë kërkuar BE-së të pezullojë zbatimin e Aktit, përpara takimit të liderëve të BE-së që u mbajt këtë të enjte në Bruksel.
Një anketë e realizuar nga Amazon Web Services tregoi se mbi dy të tretat e bizneseve evropiane kanë vështirësi të kuptojnë përgjegjësitë që rrjedhin nga Akti për Inteligjencën Artificiale të BE-së. Ndërsa SHBA ndjek një qasje më të lehtë dhe me zbatim vullnetar, dhe Kina fokusohet tek stabiliteti shoqëror dhe kontrolli shtetëror, qasja e BE-së mbetet më gjithëpërfshirëse dhe strikte.
“Ne jemi aktualisht në procesin e zbatimit të Aktit për Inteligjencën Artificiale,” tha Henna Virkkunen, komisionerja teknologjike e BE-së, para eurodeputetëve më herët gjatë këtij muaji, kur u pyet nëse do të konsideronte pezullimin e përkohshëm të zbatimit të Aktit. “Dua ta zbatojmë në një mënyrë që të jetë miqësore ndaj inovacionit… shqetësimi kryesor i disa aktorëve është se kjo po pengon zhvillimet inovative.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
