Një grua ka rënë pre e një mashtrimi financiar, duke humbur qindra mijëra dollarë, pasi u bind se po komunikonte çdo ditë me Elon Musk.
Në rrjete sociale, një përdorues ka shpërndarë një foto të një “letre” që dukej zyrtare, e cila pretendohej se ishte dërguar nga CEO i Tesla-s. Letra i drejtohej bashkëshortit të gruas dhe përshkruante në detaje një investim të supozuar në Tesla. Në dokument thuhej se, për të “aksesuar” fondet që ajo kishte investuar tashmë, duhej të transferonte edhe më shumë para. Sipas letrës, “disbursimet e mbetura” do të përpunoheshin vetëm pasi të kryhej “pagesa finale” prej 10,000 paundësh (rreth 13,500 dollarë). Në fund të letrës ndodhej edhe emri i Elon Musk, me atë që dukej si nënshkrimi i tij.
Personi që publikoi historinë e përshkroi situatën si “shumë të trishtueshme”, duke zbuluar se vjehrra e tij ishte plotësisht e bindur se po fliste me Musk dhe se po investonte në një aksion privat, i cili nuk ishte i aksesueshëm për publikun e gjerë.
“Kjo ka ndodhur prej vitesh,” shkroi ai. “Ajo nuk i beson askujt që i thotë se është mashtrim. Ajo mendon se flet çdo ditë me Elon Musk në WhatsApp, madje edhe me gjithë bordin e tij drejtues.”
Sipas tij, familja ka ndërmarrë hapa ekstremë për ta ndalur mashtrimin: janë përfshirë policia, mjekët dhe bankat, por pa sukses. “Të gjithë thonë se nuk mund të bëjnë asgjë, për sa kohë ajo nuk përbën rrezik për veten ose për të tjerët,” shpjegon ai.
“Ne nuk dimë më çfarë të bëjmë. Ajo tani është praktikisht e falimentuar. Edhe sikur kjo histori të bëhej virale dhe vetë Elon Musk të dilte publikisht ta mohonte, ajo nuk do ta besonte. Do të thoshte se kjo është ajo që ai duhet të bëjë publikisht për ta mbajtur investimin sekret.” Shumë përdorues të rrjeteve sociale kanë shprehur mbështetje dhe keqardhje për familjen, duke sugjeruar që të kontaktojnë qendra kombëtare për raportimin e mashtrimeve financiare.
Fatkeqësisht, mashtrimet ku përdoret emri i Elon Musk nuk janë të rralla. Një rast i ngjashëm ka ndodhur edhe në Jensen Beach, Florida, ku një grua i tha Fox News: “Më thoshte vazhdimisht se ishte dita ime me fat. Më tha se kisha fituar një Tesla të bardhë dhe 250,000 dollarë cash. E vetmja gjë që duhej të bëja ishte t’i dërgoja një Apple Gift Card prej 200 dollarësh.”
Ajo shtoi se pasi kishte dërguar 800 dollarë në total, mashtruesi kërkoi edhe më shumë para, duke pretenduar se duheshin për të paguar kamionin që po sillte ‘çmimin’.
Si ta dalloni një mashtrim
Komisioni Federal i Tregtisë (FTC) rendit katër shenja kryesore për të identifikuar mashtrimet:
- Mashtruesit shtiren si persona apo institucione të besueshme, si kompani sigurimesh, zyra qeveritare apo figura të njohura.
- Krijojnë një situatë urgjente ose një “fitore” të rreme, për t’ju shtyrë të veproni.
- Ju ushtrojnë presion për të vepruar menjëherë, duke ju lënë pak kohë për të menduar ose për t’u këshilluar me të tjerë.
- Kërkojnë pagesa në forma të vështira për t’u gjurmuar, si kriptomonedha, karta dhuratë ose transferta jo standarde.
Ekspertët këshillojnë që çdo ofertë investimi ose fitimi që duket “shumë e mirë për të qenë e vërtetë”, duhet trajtuar me dyshim të lartë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
