Google prezantoi për përdoruesit në SHBA funksionin e ri “AI Mode”, një risi që – sipas CEO-së së Alphabet, Sundar Pichai – përfaqëson “një rishpikje të plotë të mënyrës si funksionon Kërkimi në Google, me aftësi shumë më të avancuara për të arsyetuar”.
Çfarë është “AI Mode”?
Risia u prezantua në konferencën vjetore Google I/O, ku u bë e ditur se “AI Mode” përdor versionin më të fundit të inteligjencës artificiale të Google, të quajtur Gemini, për t’i mundësuar përdoruesve të bëjnë pyetje shumë më të ndërlikuara dhe të marrin përgjigje më të thelluara, më të personalizuara dhe më të dobishme. “Ju mund të pyesni gjithçka,” tha Liz Reid, drejtuese e Kërkimit në Google, “dhe një agjent i zgjuar dhe i personalizuar do të merret me pyetjet më komplekse dhe do t’ju ndihmojë të zgjidhni probleme konkrete. Ky është e ardhmja e Google – një kërkim që nuk ofron vetëm informacion, por inteligjencë.” Më vonë gjatë vitit, “AI Mode” do të fillojë të ofrojë edhe sugjerime të personalizuara bazuar në kërkimet e mëparshme të përdoruesve. Po ashtu, përdoruesit do të kenë mundësi të lidhin këtë mënyrë kërkimi me aplikacione të tjera të Google, si Gmail.
Lexo edhe:Google prezanton Veo 3 – Modeli i ri i AI që gjeneron video me zë
Pse ka rëndësi kjo risi?
Funksioni ekzistues “AI Overviews” ka rezultuar shumë i suksesshëm: çdo muaj përdoret nga mbi 1.5 miliardë njerëz në më shumë se 200 shtete, theksoi Pichai. Ndërsa njerëzit përdorin gjithnjë e më shumë këtë formë të avancuar kërkimi, klikimet mbi rezultatet tradicionale të sponsorizuara – që kanë qenë burim kryesor të ardhurash për Google – kanë rënë ndjeshëm. Kjo krijon shqetësim të veçantë për botuesit e vegjël dhe krijuesit e përmbajtjes, të cilët varen nga trafiku i drejtpërdrejtë nga Google. Në këtë kontekst, “AI Mode” mund ta shtojë edhe më tej këtë ndikim negativ. Sipas “Financial Times”, drejtuesit e Google nuk dhanë shumë detaje mbi mënyrën se si do të përfshihen reklamat në këtë përvojë të re kërkimi me inteligjencë artificiale. Pavarësisht kësaj, është e qartë se “AI Mode” sinjalizon një ndryshim rrënjësor në mënyrën se si njerëzit përdorin Google – dhe rrjedhimisht në vetë kuptimin që kemi për shprehjen “me e kërkuar në Google”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
