Google po përballet me një padi në Britani, ku kërkohen deri në 5 miliardë paund (rreth 6.6 miliardë dollarë) dëmshpërblim, nën akuza se kompania ka abuzuar me pozicionin e saj dominues në tregun e kërkimit online.
Padia kolektive, e dorëzuar të martën në Tribunalin e Apelimit të Konkurrencës, pretendon se veprimet e Google i kanë mundësuar kompanisë të ngarkojë çmime më të larta për reklamat që shfaqen në rezultatet e kërkimit, sesa do të ishte e mundur në një treg konkurrues.
Në dokument thuhet se kompania amerikane, që është në pronësi të Alphabet (GOOGL), ka kontraktuar prodhues të telefonëve për të parapërfshirë shërbimin Google Search dhe shfletuesin Chrome në pajisjet Android, si dhe ka paguar Apple-in për ta bërë motorin e saj të kërkimit opsionin parazgjedhur në iPhone, me qëllim të përjashtimit të konkurrentëve. Padia është ngritur nga ekspertja e ligjit të konkurrencës, Or Brook, në emër të mijëra bizneseve. Sipas saj, Google ka siguruar që motori i saj i kërkimit të ketë funksionalitete dhe veçori më të avancuara për ofertën e vet reklamuese krahasuar me konkurrentët. Google e ka cilësuar padinë si “një tjetër rast spekulativ dhe oportunist.”
“Do të mbrohemi me vendosmëri kundër kësaj padie,” tha një zëdhënës i kompanisë. “Konsumatorët dhe reklamuesit përdorin Google sepse është i dobishëm, jo sepse nuk ka alternativa.” Sipas Or Brook, bizneset nuk kanë thuajse asnjë mundësi tjetër përveçse të përdorin reklamat në Google për të promovuar produktet dhe shërbimet e tyre. “Rregullatorët në mbarë botën e kanë përshkruar Google-in si një monopol, dhe sigurimi i një pozicioni në faqet e para të kërkimit është thelbësor për dukshmërinë,” tha ajo në një deklaratë. “Google po e shfrytëzon dominimin e vet në tregun e kërkimit dhe reklamimit për të mbingarkuar reklamuesit.” Autoriteti britanik i konkurrencës nisi një hetim ndaj shërbimeve të kërkimit të Google në janar, duke përfshirë ndikimin e tyre në tregjet e reklamimit. Autoriteti i Konkurrencës dhe Tregjeve në Britani (Competition and Markets Authority) deklaroi në atë kohë se miliona njerëz dhe biznese varen nga shërbimet e Google-it, të cilat përbëjnë 90% të kërkimeve online dhe përdoren nga mbi 200,000 biznese në Mbretërinë e Bashkuar për të reklamuar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
