Grupi italian Moltiply ka ngritur një padi kundër Google dhe kompanisë mëmë Alphabet, duke kërkuar dëmshpërblim në vlerën 2.97 miliardë euro (rreth 3.34 miliardë dollarë), me pretendimin se gjigandi amerikan ka abuzuar me pozitën dominuese në treg, një sjellje që më herët është konstatuar si e tillë nga Gjykata e Drejtësisë së Bashkimit Europian
Në qendër të padisë qëndron faqja e njohur italiane për krahasimin e çmimeve, Trovaprezzi.it, e administruar nga nënkompania 7Pixel, në pronësi të Moltiply.
Sipas padisë, veprimet e Google midis viteve 2010 dhe 2017 kanë penguar zhvillimin e 7Pixel, duke favorizuar në mënyrë të padrejtë shërbimin e vet, Google Shopping.
Padia është dorëzuar në Gjykatën e Milanos, pa dhënë detaje të tjera mbi dokumentacionin apo procedurat ligjore. Një zëdhënës i Google, në një deklaratë për Reuters, e ka quajtur kërkesën për dëmshpërblim “ekzagjeruar” dhe theksoi se ajo “nuk merr parasysh një industri të suksesshme dhe në rritje”.
Lexo edhe: OpenAI përgatitet për bursë, në tryezë marrëveshja miliardëshe me Microsoft
Komisioni Europian e kishte gjobitur Google në vitin 2017 me 2.42 miliardë euro për favorizimin e shërbimit të vet të krahasimit të çmimeve në kurriz të konkurrentëve më të vegjël në Europë. Në shtator të vitit të kaluar, Google humbi përfundimisht apelimin ndaj kësaj gjobe.
“Ndryshimet që Google aplikoi pas vendimit të Komisionit Europian në vitin 2017 po japin rezultat”, shtoi zëdhënësi. “Numri i faqeve të pavarura për krahasimin e çmimeve që përdorin shërbimet tona është rritur nga vetëm 7 në më shumë se 1,550 në të gjithë Europën.”
Corriere della Sera
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
