Google ka ndërmarrë një nga fushatat më të mëdha të pastrimit dixhital ndonjëherë, duke pezulluar plot 39.2 milionë llogari reklamuese gjatë vitit të kaluar dhe gjithçka falë përdorimit të inteligjencës artificiale (AI).
Lexo gjithashtu: A e ka humbur Apple shkëlqimin e aksioneve?
Raporti i sigurisë së reklamave për vitin 2024, i publikuar më 16 prill nga Google, zbulon se kompania ka implementuar mbi 50 përmirësime në modelet e saj të mëdha gjuhësore (LLMs), të cilat kanë mundësuar zbatimin më të saktë dhe më efikas të politikave të reklamimit. “AI na ka ndihmuar të dallojmë shenjat e mashtrimeve që përdoren nga aktorët e këqinj, përfshirë edhe informacionin mashtrues të pagesave gjatë krijimit të llogarive,” deklaroi Alex Rodriguez, menaxher i përgjithshëm për sigurinë e reklamave në Google.
Rezultatet janë mbresëlënëse, përveç pezullimit të miliona llogarive, janë kufizuar 9.2 miliardë reklama dhe janë hequr 5.1 miliardë të tjera që rezultuan të rreme apo mashtruese. Një prej kërcënimeve më të zakonshme ka qenë rritja e reklamave që përdorin imazhe apo identitete të krijuara me AI për të mashtruar përdoruesit, veçanërisht duke imituar figura publike për qëllime financiare.
Lexo gjithashtu: Spitalet e së ardhmes/ Shqiptari Labinot Bytyqi siguron 47 mln dollarë për platformën hellocare.ai
“Arritëm të pezullonim përfundimisht mbi 700,000 llogari reklamuesish të tillë,” shtoi Rodriguez, “duke çuar në një ulje prej 90% të raportimeve për këtë lloj mashtrimi gjatë vitit të kaluar.”
Megjithëse AI shpesh perceptohet si burim kërcënimesh në hapësirën kibernetike, si sulmet përmes deepfake apo vjedhja e fjalëkalimeve nëpërmjet shfletuesit Chrome, ky zhvillim i fundit tregon edhe anën pozitive të saj. AI po bëhet një aleat kyç në mbrojtjen e përdoruesve të Gmail, Android dhe Chrome nga reklamat mashtruese dhe skemat dixhitale.
Google thotë se përmes këtyre teknologjive, ka arritur të krijojë një balancë më të mirë midis mbrojtjes së përdoruesve dhe ofrimit të një platforme efektive për bizneset legjitime. Ndërkohë që betejat kundër mashtrimeve dixhitale vazhdojnë, duket se këtë herë inteligjenca artificiale është në anën e duhur.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
