Gjiknuri: tarifë kalimi, ose taksë të gjithë shqiptarëve për rrugën Durrës-Morinë

Pas kryeministrit, edhe Ministri i Infrastrukturës dhe Energjisë, Damian Gjiknuri ka shpalosur argumentat mbrojtës për pagesën e nevojshme në kalimin e Rrugës së Kombit. Në një takim me mediat GJiknuri theksoi se ka një hendek financiar mes nevojës për mirëmbajtje të rrugës dhe fondeve në dispozicion çka sipas tij e bëri të nevojshme kontratën koncesionare. Duke spjeguar detaje të kontratës, Gjiknuri tha se, tarifa është rezultat i një studimi ku janë përfshirë të gjithë elementët. “Dy rrugë kishte: Ose do të rrisnim gjithë taksat e shqiptarëve që ta mirëmbajmë atë rrugë ose do e paguajnë ata që e përdorin. Rruga është akoma e papërfunduar dhe ka shumë investime për t’u bërë”, tha ai.

Duke theksuar se mirëmbatja është e nevojshme në rrugët e reja që po mbahen, ai vuri në dukje se në rrugën Tiranë-Elbasan, vetëm rrëshqitja e gurëve shkaktoi një dëm prej 4 milionë euro. Në rastin e rrugës së Kombit kontrata është nënshkruar me konsorciumin në dhjetor 2016. Sipas Ministrit të Transporteve, grupi ka investuar deri më tani 15 mln euro në mbrojtje dhe rregullimin e skarpatave të dëmtuara.

Lidhur me protestat, ministri ka theksuar se dhuna është motivuar politikisht. “Po bëhet një vlerësim paraprak për dëmet në stacionin e pagesës. Dëmi shkon disa miliona euro. Ky investim nuk duhet ngatërruar me investimin privat, është pronë publike investim që i takon shtetit shqiptar. Dëmi iu bë taksapaguesve dhe kapitalizohet në llogari të gjithë kontratës”, tha Gjiknuri para gazetarëve.