Mira Murati është pjesë e listës së Fortune për “100 Gratë më të Fuqishme në Biznes” për vitin 2025. Ajo renditet në vendin e 47-të, një ngjitje nga pozicioni i saj i mëparshëm në vendin e 57-të në vitin 2024 .Pas largimit nga pozita e CTO-së në OpenAI në shtator 2024, Murati themeloi startup-in e saj të inteligjencës artificiale, Thinking Machines Lab, ku aktualisht shërben si CEO. Ky startup është vlerësuar me një vlerë të mundshme prej 10 miliardë dollarësh, duke e bërë atë një nga startup-et më të vlefshme në fushën e AI-së .
Përfshirja e saj në këtë listë nënvizon ndikimin e saj të vazhdueshëm në industrinë e teknologjisë dhe rolin e saj si një nga gratë më të fuqishme në biznesin global. Revista e njohur e përshkruan kështu profilin e saj:
“Mira Murati, ish-drejtoreshë e teknologjisë së OpenAI, e habiti Silicon Valley kur dha dorëheqjen nga kompania në shtator 2024: Ajo kishte qenë forca lëvizëse pas ChatGPT, modelit revolucionar të AI-së. Gjashtë muaj më vonë, Murati hodhi në treg Thinking Machines Lab, një startup të AI-së që po bën bujë, edhe pse është ende në modalitet të fshehtë. Por, ndërsa detajet rreth projektit mbeten të pakta, ndikimi i 36-vjeçares Murati në sektorin e AI-së është i qartë: Në mesin e majit, ajo thuhet se ishte afër fitimit të 2 miliardë dollarëve në atë që do të përfaqësonte raundin më të madh të investimit në historinë e teknologjisë, duke e vlerësuar Thinking Machines në 10 miliardë dollarë”.
Lexo edhe: A është Mira Murati Elon Musk-u i AI-së? 5 fakte që duhet të dini për Thinking Machines Lab
Për të dytin vit radhazi dhe për herë të pestë në total, Mary Barra, CEO e General Motors kryeson listën. Aftësia e saj për ta udhëhequr kompaninë përmes sfidave të mëdha si grevat, aksidentet, tarifat dhe “Trump 2.0”, e ka mbajtur në krye.
Pas saj renditen: Julie Sweet (CEO e Accenture), Jane Fraser (CEO e Citigroup), dhe Lisa Su (CEO e AMD). Gruaja më e fuqishme në Evropë është Ana Botín (Santander) në vendin e pestë, ndërsa në Azi spikat Tan Su Shan (DBS Bank, Singapor).
Lista përfshin 52 gra nga SHBA dhe 48 nga pjesë të tjera të botës – përkatësisht 21 nga Evropa dhe 19 nga Azia. Pas SHBA-së, Kina ka numrin më të lartë të grave lidere në biznes me 8 përfaqësuese, e ndjekur nga Franca dhe Mbretëria e Bashkuar me nga 7 secila.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
