Food Lovers, sipërmarrja që mbledh bashkë rreth tryezës të apasionuarit pas gatimit

Një prej sipërmarrjeve më interesante në kryqytet është Food Lovers. E ngritur nga Ardeta Koçi, ajo është bërë një pikë e rëndësishme takimi për ata që janë të apasionuar pas gatimit, por mbi të gjitha për ata që duan të mësojnë. Ardeta Koçi, themeluese e Food Lovers tregon në një intervistë rreth këtij projekti të ri dhe modelit të parë në vend dedikuar gatimit.

Çfarë ju inspiroi për të krijuar Food Lovers dhe si lindi ideja për këtë platformë unike?

Ideja për të krijuar Food Lovers lindi nga një dëshirë personale për të krijuar diçka që nuk ekzistonte më parë, diçka që do të bashkonte njerëzit në një mënyrë të veçantë përmes pasionit për ushqimin. Kam pasur gjithmonë një dashuri të thellë për ushqimin, jo vetëm si një mënyrë për të ushqyer trupin, por edhe si një urë që lidh njerëzit. Ushqimi ka fuqinë të krijojë lidhje, të thyejë barriera dhe të sjellë bashkë njerëz nga kultura dhe prejardhje të ndryshme. Në përvojën time të gjatë në tregun e Hoteleri-Turizmit, e vura re që ndonëse kishte shumë nisma kulinare dhe kurse gatimi, mungonte një platformë e mirëfilltë që të ofronte më shumë se thjesht mësimin e recetave. Desha të krijoja një komunitet ku entuziastët e ushqimit të ndajnë njohuritë e tyre, të eksplorojnë së bashku dhe të krijojnë një lidhje përmes eksperiencave kulinare. Kjo dëshirë, së bashku me mungesën e një platforme të tillë në treg, u bë frymëzimi për të krijuar Food Lovers.

Duke qenë se keni një përvojë të gjatë në sektorin e Hoteleri-Turizmit, si ka ndikuar kjo përvojë në vizionin tuaj për Food Lovers?

Përvoja ime në sektorin e Hoteleri-Turizmit ka ndikuar në mënyrë të thellë në vizionin që kam për Food Lovers. Gjatë viteve të punës sime në këtë sektor, kam pasur mundësinë të shoh nga afër se çfarë e bën një eksperiencë të suksesshme dhe të këndshme për klientët. Kjo përvojë më ka ndihmuar të kuptoj rëndësinë e detajeve dhe të krijoj një platformë që përmbush jo vetëm nevojat funksionale të pjesëmarrësve, por edhe ato emocionale. Një nga gjërat më të rëndësishme që kam mësuar është se njerëzit duan diçka më shumë sesa thjesht një produkt apo shërbim – ata duan përvojë, emocion, dhe ndjenjë përkatësie. Këtë përvojë jam përpjekur të sjell në Food Lovers. Platforma jonë është shumë më tepër se një vend ku mëson si të gatuash; është një hapësirë ku njerëzit ndihen të mirëpritur, ndihen pjesë e një komuniteti dhe ku ndërtojnë lidhje të reja përmes dashurisë së përbashkët për gatimin.

Cili ishte qëllimi juaj kryesor kur vendosët të lançoni Food Lovers dhe si mendoni që ky projekt i ndihmon pjesëmarrësit të lidhen përmes gatimit?

Qëllimi kryesor kur vendosa të krijoja Food Lovers ishte të ndërtoja një platformë që të nxisë lidhje mes njerëzve përmes një pasioni të përbashkët – gatimit. Gatimi është më shumë se një proces teknik; është një akt krijimi, një formë arti që kërkon ndarje dhe bashkëpunim. Kam dashur që pjesëmarrësit të ndihen të lidhur, jo vetëm përmes ushqimit që përgatisin, por edhe përmes emocioneve dhe përvojave që ndajnë gjatë procesit. Ajo që e bën këtë projekt të veçantë është natyrshmëria me të cilën zhvillohet ky rrjetëzim. Pjesëmarrësit nuk e ndiejnë presionin e aktiviteteve të strukturuara apo formaliteteve, por ndihen të lirë të jenë vetvetja, të ndajnë mendime dhe përvoja me të tjerët. Kjo qasje organike ndihmon në krijimin e lidhjeve më të forta dhe më autentike midis pjesëmarrësve.

Food Lovers duket të jetë më shumë se thjesht një kurs gatimi. Si ndikon eksperienca e rrjetëzimit në suksesin e këtij projekti?

Eksperienca e rrjetëzimit është një nga shtyllat kryesore që ndihmon në suksesin e Food Lovers. Fakti që sjellim së bashku profesionistë dhe sipërmarrës nga fusha të ndryshme në një mjedis të tillë informal, ku qëllimi kryesor është thjesht të shijojnë gatimin dhe njëri-tjetrin, e bën të veçantë këtë eksperiencë. Rrjetëzimi këtu nuk është i imponuar; ai ndodh natyrshëm. Kur individët ndihen të lirë dhe të relaksuar, ata janë më të hapur për të ndarë ide dhe përvoja, duke krijuar mundësi për bashkëpunime të reja. Është e mrekullueshme të shohësh se si njerëzit që në fillim janë të panjohur, brenda pak orësh krijojnë lidhje të reja dhe formojnë një komunitet që mbështet njëri-tjetrin. Ushqimi është një element bashkues, dhe përmes tij, pjesëmarrësit krijojnë lidhje që mund të shkojnë përtej kufijve profesionalë.

Si i përzgjidhni shefat e kuzhinës që drejtojnë kurset dhe çfarë vlerash sjellin ata në këtë përvojë?

Përzgjedhja e shefave të kuzhinës për Food Lovers është një proces shumë i kujdesshëm dhe strategjik. Ne kërkojmë jo vetëm ekspertë të shkëlqyer në fushën e tyre, por edhe njerëz që kanë aftësi të mëdha komunikimi dhe që dinë të krijojnë një atmosferë të këndshme dhe bashkëpunuese. Njohuritë e tyre profesionale janë thelbësore, sigurisht, por për ne është po aq e rëndësishme që ata të kenë aftësinë për të përcjellë pasionin e tyre në mënyrë që pjesëmarrësit të ndihen të frymëzuar dhe të angazhuar. Një shef i mirë duhet të jetë edhe një lider që krijon një energji pozitive dhe ndërton raporte me të gjithë. Në Food Lovers, ne kërkojmë shefa që dinë të balancojnë seriozitetin dhe humorin, duke i bërë kurset jo vetëm informuese, por edhe argëtuese.

A mund të ndani disa nga sfidat kryesore që hasët gjatë krijimit dhe lançimit të Food Lovers?

Si çdo startup, edhe Food Lovers është përballur me një sërë sfidash që nga fillimi. Një nga sfidat më të mëdha ishte gjetja e një ambienti të përshtatshëm që të përmbushte nevojat tona për kurse dhe evente. Nevojiteshin kushte të caktuara për të krijuar një ambient të ngrohtë dhe komod, ku pjesëmarrësit të ndiheshin rehat dhe të përfshirë. Një tjetër sfidë ishte koordinimi i shefave të kuzhinës, pasi shumë prej tyre janë të angazhuar në restorantet e tyre dhe të përshtatnin oraret e tyre me kurset tona kërkonte shumë përpjekje. Por me kohën kemi arritur të gjejmë mënyra për të kapërcyer këto sfida dhe për të krijuar një ekosistem që funksionon mirë.

Çfarë e bën Food Lovers të veçantë dhe ndryshe nga çdo platformë tjetër për trajnime kulinare?

Ajo që e bën Food Lovers të veçantë është ndërthurja unike e përvojave kulinare me rrjetëzimin dhe bashkëpunimin. Nuk është thjesht një kurs gatimi, por një platformë ku njerëz me pasione të përbashkëta krijojnë lidhje dhe ndajnë përvoja. Përzgjedhja e pjesëmarrësve është një pjesë kyçe e suksesit tonë – secili prej tyre sjell diçka unike në grup, dhe në fund, kjo kombinim sjell një “pjatë” të jashtëzakonshme, plot ngjyra dhe shije. Kurset tona nuk kanë të bëjnë vetëm me mësimin e teknikave të reja, por edhe me krijimin e një ambienti ku njerëzit ndihen të frymëzuar dhe të lidhur.

Si e shihni të ardhmen e Food Lovers dhe cilat janë planet tuaja për zhvillimin e mëtejshëm të kësaj platforme?

E ardhmja e Food Lovers duket interesante, dhe ne kemi plane të mëdha për të zgjeruar këtë platformë. Aktualisht, ofrojmë një sërë shërbimesh si klasa gatimi, klasa kokteilesh, degustime vere, darka private për kompani dhe individë, aktivitete për fëmijë dhe prezantime ushqimore. Planet tona për të ardhmen përfshijnë krijimin e një produkti ekskluziv nën emrin Food Lovers, që të reflektojë filozofinë tonë për përvojat unike dhe përfshirëse. Synimi ynë është që Food Lovers të bëhet një markë referencë për këdo që dëshiron të eksplorojë botën e ushqimit, duke bashkuar kreativitetin dhe komunitetin.

Si është pritur Food Lovers nga profesionistët dhe liderët ekzekutivë që kanë marrë pjesë në këto kurse?

Pritja ka qenë fantastike! Kam qenë e befasuar nga mënyra se si liderët dhe profesionistët kanë reaguar ndaj eksperiencës që ofron Food Lovers. Sigurisht që kisha pritshmëri pozitive, por reagimet kanë qenë më të thella sesa e imagjinoja. Profesionistët janë ndjerë të lidhur, të angazhuar dhe të frymëzuar nga atmosfera që kemi krijuar. Për ta, ka qenë një mundësi e shkëlqyer për t’u rilidhur me pasionin për ushqimin dhe për të ndërtuar marrëdhënie të reja në një mjedis të relaksuar.

A mund të ndani një moment të veçantë nga përvojat e para të pjesëmarrësve në Food Lovers që ka lënë një përshtypje të thellë tek ju?

Një nga momentet më të veçanta për mua ka qenë të shoh transformimin që ndodh gjatë një kursi të Food Lovers. Kur pjesëmarrësit hyjnë për herë të parë, shpesh janë të heshtur dhe të ndrojtur. Por brenda pak minutash, me ndihmën e atmosferës së ngrohtë dhe të angazhuar që krijojmë, ata fillojnë të ndihen rehat dhe të hapur. Një moment që më ka lënë një përshtypje të thellë ishte kur vëzhgova një grup të panjohurish që, në fund të një kursi, kishin krijuar një lidhje kaq të ngushtë sa filluan të bëjnë plane për t’u takuar përsëri jashtë Food Lovers. Kjo është ajo që e bën këtë përvojë kaq të veçantë – fuqia e ushqimit për të krijuar lidhje të thella dhe të qëndrueshme.

https://www.instagram.com/foodlovers_al/