Fondacioni Gates ka njoftuar një angazhim financiar prej 1.6 miliardë dollarësh në mbështetje të ‘Gavi – Aleanca për Vaksinat’, për një periudhë pesëvjeçare, si pjesë e përpjekjeve për të forcuar programet globale të vaksinimit.
Ky zotim përfaqëson një vazhdim të një partneriteti të gjatë mes dy organizatave, por edhe një reagim i drejtpërdrejtë ndaj rënies së buxheteve ndërkombëtare për zhvillim dhe ndryshimeve të theksuara në prioritetet politike globale.
Njoftimi u bë publik gjatë Samitit Global për Shëndetin dhe Mirëqenien përmes Imunizimit, një aktivitet për mbledhjen e fondeve për Gavi-n, i organizuar në Bruksel, ku morën pjesë përfaqësues të BE-së dhe Fondacioni Gates.
Lexo edhe: Miliona fëmijë pa vaksina, a po rrezikohet e ardhmja e shëndetit global?
Që nga themelimi i saj 25 vite më parë—me mbështetjen e drejtpërdrejtë të Fondacionit Gates—Gavi ka arritur të ulë në gjysmë vdekshmërinë e fëmijëve në mbarë botën dhe të vaksinojë mbi 1.1 miliardë fëmijë në 78 shtete me të ardhura të ulëta.
Ky angazhim financiar vjen menjëherë pas deklaratës së Fondacionit Gates se do të shpenzojë të gjithë fondin e tij brenda 20 viteve të ardhshme, me qëllim maksimizimin e ndikimit në çështje urgjente si shëndeti global, arsimi dhe barazia.
“Për herë të parë pas disa dekadash, numri i fëmijëve që vdesin në mbarë botën ka të ngjarë të rritet këtë vit, jo të ulet, për shkak të shkurtimeve masive në ndihmën e jashtme. Kjo është një tragjedi,” paralajmëroi Bill Gates, kryetar i fondacionit. “Financimi i plotë i Gavi-t është hapi më i fuqishëm që mund të ndërmarrim për ta ndalur këtë.”
Përballë një peizazhi të lëkundur ndërkombëtar, me ndihmën e jashtme në rënie dhe interes të zbehur politik për shëndetin publik global, ky zotim përforcon rolin qendror që Gavi ka në mbrojtjen e fëmijëve në vendet më të varfra të botës nga sëmundjet e parandalueshme.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
