Finlanda ka miratuar një ligj të ri që kufizon përdorimin e telefonave dhe pajisjeve të tjera digjitale gjatë ditës në shkollë, mes shqetësimeve në rritje për ndikimin e tyre në mirëqenien dhe të nxënit e fëmijëve. Sipas ligjit, i miratuar të martën nga parlamenti finlandez dhe që hyn në fuqi më 1 gusht, përdorimi i celularëve do të kufizohet ndjeshëm gjatë orëve të mësimit. Nxënësit mund t’i përdorin ato vetëm me lejen e mësuesit për qëllime mësimore ose shëndetësore.
Finlanda i bashkohet kështu një grupi vendesh evropiane që po marrin masa ligjore për të kufizuar përdorimin e telefonave në shkolla, në përballje me të dhënat që tregojnë ndikim negativ tek të rinjtë – nga shpërqendrimi tek vetëvlerësimi i ulët.
Më herët këtë vit, Danimarka njoftoi ndalimin e celularëve në të gjitha shkollat. Rasmus Meyer, drejtues i komisionit për mirëqenie, tha për The Guardian se kjo masë është e nevojshme për të ndaluar “kolonizimin e shkollave nga platformat digjitale” dhe ftoi edhe shtetet e tjera evropiane të ndjekin shembullin.
Parlamenti finlandez ka urdhëruar gjithashtu një studim për të vlerësuar efektet e kufizimeve të reja brenda dhe jashtë vendit, që do të përfundojë deri në fund të vitit të ardhshëm. Nëse rezulton i nevojshëm, do të ndërmerren masa të tjera.
Lexo edhe: Njihuni me “superfuqinë” që i mungon shumicës së adoleshentëve, gjumi i mjaftueshëm
Sipas rregullave të reja, nxënësit mund të përdorin celularët gjatë mësimit vetëm për qëllime edukative ose për kujdes ndaj shëndetit të tyre. Në rast se pajisjet digjitale pengojnë mësimin, drejtori ose mësuesi ka të drejtë t’i konfiskojë. Shkollat do të duhet të përcaktojnë edhe rregulla për përdorimin dhe ruajtjen e pajisjeve gjatë orëve, vakteve dhe pushimeve.
Megjithatë, disa deputetë kundërshtuan ligjin, duke thënë se kufizimet duhet të shtriheshin edhe në kohën e pushimeve dhe gjatë vakteve.
Ministri i Arsimit i Finlandës, Anders Adlercreutz, deklaroi të martën:
“Përmes këtij ligji, u japim nxënësve mundësi më të mira për t’u përqendruar në studime dhe u japim mësuesve mjetet e nevojshme për të krijuar një mjedis pune të qetë që mbështet të nxënit.”
Sipas tij, ky ligj do të krijojë gjithashtu “më shumë mundësi për ndërveprim domethënës”.
“Shkolla nuk është thjesht vend ku mësohen njohuri. Është edhe vendi ku zhvillohen aftësitë shoqërore. Kur sytë janë gjithnjë në ekran, ndërveprimi bëhet i vështirë. Prandaj duam t’u japim nxënësve më shumë hapësirë për të komunikuar gjatë ditës shkollore,” përfundoi ministri.
Burimi: The Guardian
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
