Fillojnë në Kinë lojërat e para botërore të robotëve humanoidë

Në Pekin janë çelur zyrtarisht Lojërat e Para Botërore të Robotëve Humanoidë, një ngjarje unike ku mbi 500 androidë po testojnë aftësitë e tyre në sporte tradicionale dhe detyra praktike. Gara po zhvillohet në National Speed Skating Oval, arenën e ndërtuar për Lojërat Olimpike Dimërore 2022.

Robotët humanoidë konkurrojnë në disiplina si atletikë, basketboll, kung fu, por edhe në detyra praktike si kategorizimi i ilaçeve apo pastrimi. Në garën e parë të mëngjesit, një ndeshje futbolli me pesëshe, androidët e ngjashëm në madhësi me fëmijë 7-vjeçarë shpesh u rrëzuan ose ngecën në turma, duke shkaktuar edhe situata komike. Megjithatë, në garën 1500 metra, robotët e kompanisë vendase Unitree treguan performancë mbresëlënëse duke lënë pas rivalët e tyre. Roboti më i shpejtë përfundoi garën në 6:29:37 minuta – ende larg rekordit botëror të njerëzve, por një hap i madh për teknologjinë.

Lexo edhe: SHBA vs BE: Dy botë, dy qasje për Inteligjencën Artificiale

Organizatorët theksojnë se ky është eventi i parë global i dedikuar vetëm për robotë me formë njerëzore. Qeveria kineze e ka vendosur robotikën humanoide në qendër të strategjisë kombëtare, duke synuar të udhëheqë industrinë dhe të tregojë konkurrueshmëri globale. Federata Ndërkombëtare e Robotikës shkroi në një raport se Pekini po shfrytëzon këtë event për të forcuar imazhin e vet si lider teknologjik. Përveç spektaklit, qeveria po përpiqet të rrisë ndërgjegjësimin për këtë sektor edhe te fëmijët dhe të rinjtë. Shkollat kineze madje po organizojnë udhëtime për nxënësit drejt lojërave për t’i frymëzuar ata që të mësojnë më shumë mbi teknologjitë e reja. Në mars të këtij viti, Kina njoftoi krijimin e një fondi gjigant prej 1 trilion juanësh për të mbështetur startup-et e teknologjisë, përfshirë edhe ato në fushën e robotikës dhe inteligjencës artificiale.

forbes