BQE do të blejë borxhin e qeverive dhe kompanive në të gjithë eurozonën, përfshirë atë të Greqisë dhe Italisë së trazuar.
Drejtoresha e ECB, Christine Lagarde ka deklaruar se”nuk ka kufij” në angazhimin e Bankës ndaj euros. I ashtuquajturi Programi i Blerjes së Urgjencës Pandemike vjen vetëm gjashtë ditë pasi Banka Qendrore Evropiane, zbuloi masa që nuk i qetësuan tregjet, përkundrazi.
Duke njoftuar këtë veprim të fundit, Lagarde tha që Banka do të bëjë gjithçka që mundet për të mbështetur euron në këto “kohë të jashtëzakonshme”. Skema e blerjes së pasurive do të jetë e përkohshme dhe do të përmbyllet kur Banka “të gjykojë se faza e krizës së koronavirus Covid-19 ka mbaruar, por në çdo rast jo para fundit të vitit”, thuhet në deklaratë. Njoftimi erdhi pasi këshilli drejtues i 25 anëtarëve të bankës zhvilloi bisedime urgjente me telefon në mbrëmjen e së mërkurës.
Ditët e fundit, Banka Qendrore Evropiane është kritikuar se nuk ka bërë sa duhet për të mbështetur eurozonën, krahasuar me veprimin drastik të ndërmarrë nga Rezerva Federale e Sh.B.A. Të dielën, FED uli normat e interesit në pothuajse zero dhe filloi një program stimulimi prej 700 miliardë dollarë (604 miliardë paund). Ishte pjesë e aksionit të koordinuar të nisur nga Britania e Madhe, Japonia, Eurozona, Kanadaja dhe Zvicra.
Si pjesë e atij njoftimi, FED tha se do të punojë me bankat e tjera qendrore për të rritur disponueshmërinë e dollarëve për bankat tregtare. Këto të ashtuquajtura linja shkëmbimi të monedhave ishin një mjet i rëndësishëm për ruajtjen e stabilitetit financiar pas krizës bankare të vitit 2008.
“Aksioni i koordinuar i sotëm nga bankat qendrore do të përmirësojë likuiditetin global, duke ulur çmimin dhe duke zgjatur afatin maksimal të operacioneve të huazimit të dollarit amerikan”, tha Guvernatori i Bankës së Anglisë Mark Carney në një deklaratë të përbashkët me Andrew Bailey.
Banka e Japonisë gjithashtu lehtësoi politikën monetare duke u zotuar të blejë asete të rrezikshme me dyfishin e ritmit aktual dhe njoftoi një program të ri kredie për të zgjatur një vit kredi me normë zero për institucionet financiare.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
