Sulmi rus në Odessa vetëm pak orë pasi u vulos marrëveshja për rifillimin e transportit të ushqimeve, nuk do ta bllokojë drithin ukrainas, të paktën këtë mendon OKB, sipas të cilës eksportet duhet të rifillojnë brenda pak ditësh.
Nisja e drithit do të bëhet nga Odesa dhe dy porte të tjera në Detin e Zi, nga porti Chernomorsk dhe Yuzhny, pohoi zëdhënësi i OKB-së, Farhan Haq, i cili shtoi se “duam të sigurohemi se do të jenë të gjitha kushtet e duhura për udhëtimin e sigurtë të anijeve”. “Çdo gjë që nuk i përmbahet kësaj, sigurisht që nuk ndihmon për suksesin e kësaj iniciative”, shtoi ai duke përsëritur dënimin nga Sekretari i Përgjithshëm Antonio Guterres të bombardimit në Odesa.
Lexo edhe: Marrëveshje për grurin mes Ukrainës dhe Rusisë
Rusia e pranoi përgjegjësinë e ketij të fundit, e sipas ministrit të jashtëm rus, Sergey Lavrov “nuk ka asgjë në angazhimet (për eksportin e drithit) që Moska firmosi në Stamboll, të cilat do të ndalonin vazhdimin e atij që rusët e përshkruajnë si operacion ushtarak, shkatërrimin e infrastrukturës ushtarake dhe objektivave të tjera ushtarake” ne vendin fqinj.
Sipas Rusisë, goditjet e saj me raketa ndaj objekteve ushtarake në Odesa, nuk duhet të ndikojnë tek marrëveshja për rifillimin e eksportit të drithit. Kombet e Bashkuara dhe Turqia ndihmuan me ndërmjetësimin e marrëveshjes së nënshkruar të premten, e cila kërkon që flota ruse në Detin e Zi të lejojë kalimin e sigurt nëpër zonat që Rusia ka bllokuar që kur nisi pushtimin e saj në Ukrainë në fund të shkurtit. Marrëveshja u përshëndet si një hap i rëndësishëm drejt zbutjes së një krize globale të ushqimeve, dhe shefi i OKB-së Guterres e quajti atë “një fener shprese, mundësie dhe lehtësimi”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
