Një eksperte e rekrutimit ka ngritur alarmin për përdorimin e inteligjencës artificiale në përmirësimin e CV-ve, duke shpjeguar se kjo praktikë mund të dëmtojë realisht shanset për të fituar një vend pune.
Në një kohë kur inteligjenca artificiale mund të zgjidhë llogaritje, të sugjerojë receta apo të organizojë axhendën ditore, është e kuptueshme pse shumë njerëz po i drejtohen teknologjisë edhe për të rritur mundësitë e tyre në tregun e punës.
AI mund të korrigjojë gabimet gramatikore dhe madje të shndërrojë detyrat më të zakonshme të një pune të mëparshme në “aftësi të vlefshme” për një punëdhënës të ri. Megjithatë, Frances Li, themeluese dhe drejtoreshë e Biscuit Recruitment, shpjegon pse CV-të e krijuara ose të rregulluara plotësisht nga AI nuk janë aspak tërheqëse për rekrutuesit.
Sipas saj, përdorimi i gjerë i AI ka ndikuar në një “fluks CV-sh që duken perfekte”, por pikërisht kjo strukturë e përkryer i bën ato të duken të ftohta dhe pa jetë. “Kur çdo aplikant tingëllon njësoj, menaxherët e punësimit e kanë të vështirë të shohin njeriun pas letrës. Individualiteti juaj, jo formatimi, është ajo që ju fut në listën e shkurtër,” shprehet Li.
Ajo shton se mjetet e AI janë të dobishme për strukturën dhe gjuhën, por kopjimi pa redaktim i rezultatit “zhvesh CV-në nga ajo që ju bën të paharrueshëm”. “Rekrutuesit nuk kërkojnë profesionalizëm robotik, ata kërkojnë autenticitet dhe qartësi.”
Gabimet që zbulojnë një CV të krijuar nga AI
Duke u bazuar në përvojën e saj, Li ndan disa nga gabimet më të shpeshta që i tradhtojnë CV-të e gjeneruara nga AI:
1. Redaktim i tepruar
Sigurisht që gabimet drejtshkrimore nuk janë të dëshirueshme, por një CV tepër e “lëmuar” humbet personalitetin. “Kandidatët po fshijnë çdo gjurmë personaliteti. Rezultati? Një CV e pastër, por e ftohtë. Punëdhënësit e dallojnë këtë,” thotë ajo. “Ndani atë që ju motivon, jo vetëm atë që keni bërë. Personaliteti krijon lidhje.”
2. Mos-përditësimi i rregullt i CV-së
Shumë njerëz e përditësojnë CV-në vetëm kur kanë urgjentisht nevojë për një punë të re. “Njerëzit presin deri sa të jenë të dëshpëruar për punë dhe më pas panikosen. Një CV e mirë është gjithmonë në proces, jo një detyrë e minutës së fundit,” shpjegon Li. Ajo këshillon të rezervohen 30 minuta çdo tremujor për të përditësuar arritjet dhe rezultatet.
3. Përdorimi i tepërt i zhargonit
Fjalë si “dinamik”, “i orientuar drejt rezultateve” apo “proaktiv” janë të zakonshme në CV-të e krijuara nga AI, por nuk thonë asgjë konkrete. “Rekrutuesit duan prova, jo mbiemra. Zëvendësoni fjalët e mëdha me rezultate reale,” thekson ajo.
4. Mungesa e përshtatjes për çdo pozicion
Dërgimi i të njëjtës CV në dhjetëra kompani mund të duket si kursim kohe, por në realitet ul ndjeshëm shanset për sukses. “Kandidatët më të mirë e përshtatin CV-në, qoftë edhe minimalisht, çdo herë,” përfundon Li.
Mesazhi i saj është i qartë: përdoreni AI për të ndihmuar strukturën dhe qartësinë, por jo për të zëvendësuar zërin tuaj. “Filloni me fjalët tuaja. Pastaj përdorni AI për të rafinuar, jo për të zëvendësuar. Është bashkëpunim, jo delegim.” Në një treg pune gjithnjë e më konkurrues, autenticiteti mbetet ende avantazhi më i fortë i çdo kandidati.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
