Eurozona vijoi rritjen ekonomike në tremujorin e tretë 2015, ndonëse ritmi i saj u zbut krahasuar me tremujorin e kaluar, bëri të ditur Banka e Shqipërisë në raportin e publikuar së fundi mbi zhvillimet ekonomike.
Sipas BSH-së, PBB në këtë tre-mujor rezultoi me një rritje prej 0.3%, ndërsa ajo vjetore prej 1.6%. Në krahasim me një vit më parë, ritmi i rritjes u forcua. Rritja ekonomike u mbështet nga kontributi pozitiv i konsumit dhe i investimeve, faktorë këta që kompensuan tkurrjen e eksporteve neto.
Banka e Shqipërisë bën të ditur se, treguesit e besimit të biznesit dhe të konsumatorëve për tremujorin e fundit kanë shfaqur ecuri pozitive. Ndërsa treguesit për prodhimin konfirmojnë vijimin e rritjes me ritme të afërta me ato të tremujorit të tretë.
Perspektiva për vitin 2016 konfirmon forcimin e aktivitetit ekonomik, ndërkohë që rreziqet lidhen kryesisht me tensionet gjeopolitike dhe dobësimin e mundshëm të ekonomive në zhvillim, gjë që mund të zbehë eksportet evropiane drejt këtyre rajoneve. Politika lehtësuese e ndjekur nga BQE-ja dhe programet e blerjes së titujve kanë rezultuar të suksesshëm në mbështetjen e aktivitetit ekonomik, por dobësia e përgjithshme e tregjeve të lëndëve të para dhe çmimet e tyre kanë ndikuar ne normat e ulëta të inflacionit gjatë gjithë kësaj periudhe. Inflacioni i Eurozonës është luhatur në vlera të ulëta dhe poshtë objektivit të BQE-së në muajt e fundit. Parashikimet për inflacionin e vitit 20163 u rishikuan për poshtë, në reflektim të vijimit të çmimeve të ulëta të naftës dhe të lëndëve të para.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
