Edhe rruga Tiranë-Durrës me pagesë » Business Magazine Albania – Media Dixhitale dedikuar Sipërmarrjes
Përditësuar së fundmi: 05/11/2018

Edhe rruga Tiranë-Durrës me pagesë

Share
nga Albana Mucaj
Nën 05, 2018

Ministri i Financave po prezanton këto ditë në Komisionin parlamentar të Ekonomisë dhe Financave projektbuxhetin për vitin e ardhshëm.Ministri foli edhe për kalimin me pagesë të rrugës Tiranë-Durrës.

Në tërësi, në projektet e infrastrukturës, objektiv sipas ministrit të Financave është plotësimi i akseve brenda vitit 2021. Rruga e Arbrit është në një fazë të avancuar të punimeve, tha ministri, ndërsa pjesë e projekteve do të jetë zgjerimi i autostradës Tiranë-Durrës me një korsi shtesë. Ahmetaj ka theksuar se projekti nuk do të paguhet nëpërmjet buxhetit. Ndërtimi i tij do të financohet fillimisht nëpërmjet investitorëve me anë të Partneritetit Publik Privat dhe kalimit të rrugës do t’i vendoset një tarifë.

Ahmetaj tha se, “Propozimi që ka mbërritur në Ministrinë e Infrastrukturës u është shpërndarë të gjitha agjencive që kanë lidhje me të. Projekti parashikon në potencë zero financim nga buxheti i shtetit. Nëse do të miratohet, privati bën investimin dhe vendos tarifën me të cilat shlyen investimin dhe mundëson mirëmbajtjen”, tha Ahmetaj.

Pritshmëritë e Qeverisë Shqiptare janë për një rritje 4.3%, ndërsa borxhi publik të ulet nën 65% e Prodhimit Kombëtar. Projektbuxheti i vitit të ardhshëm parashikon edhe rritjen e rrogave për 65 mijë punonjës në shëndetësi, arsim, mbrojtje. Pensionet parashikohet të rriten 3%.