Pas bisedimeve të fundjavës me zyrtarë kinezë në Gjenevë, Sekretari Amerikan i Thesarit, Scott Bessent, njoftoi se të dyja palët kishin rënë dakord për një pauzë 90-ditore në masat tregtare ndëshkuese. Shtetet e Bashkuara do të tërheqin tarifat shtesë të vendosura këtë vit ndaj mallrave kineze, duke i ulur ato nga 145% në 30%. Në të njëjtën kohë, Kina do të përgjysmojë tarifat ndaj produkteve amerikane nga 125% në 10%.
“Të dy vendet përfaqësuan interesat e tyre kombëtare në mënyrë shumë të mirë,” deklaroi Bessent. “Ne kemi një interes të përbashkët për një tregti të balancuar dhe SHBA do të vijojë drejt këtij qëllimi.”
Ai shtoi se “konsensusi nga të dy delegacionet ishte i qartë: asnjëra palë nuk dëshiron një shkëputje të marrëdhënieve ekonomike. Ajo që kishte ndodhur me këto tarifa shumë të larta… ishte e barasvlershme me një embargo. Dhe askush nuk e dëshiron këtë. Ajo që duam është tregtia.”
Takimet në Gjenevë ishin kontakti i parë ballë për ballë mes zyrtarëve të lartë ekonomikë të dy vendeve që prej kthimit të Donald Trump në pushtet dhe nisjes së një vale globale tarifash, me fokus të veçantë ndaj Kinës.
Lexo edhe: Bill Gates do të dhurojë 200 miliardë dollarë deri në vitin 2045
Përplasja tarifore kishte ngrirë pothuajse 600 miliardë dollarë në shkëmbime tregtare, duke shkaktuar ndërprerje të zinxhirëve të furnizimit, frikë nga stagflacioni dhe disa shkurtim vendesh pune.
Tregjet financiare reaguan pozitivisht ndaj këtij zbutjeje të tensioneve dhe futures e bursave në Wall Street u rritën, duke rritur shpresat se mund të shmanget një recesion global.
“Ky është pa dyshim një lajm shumë pozitiv për ekonomitë e të dy vendeve, por edhe për ekonominë globale. Kjo i qetëson ndjeshëm investitorët për dëmet afatshkurtra në zinxhirët globalë të furnizimit,” u shpreh Zhiwei Zhang, kryeekonomist në Pinpoint Asset Management në Hong Kong.
Trump kishte vendosur tarifat pjesërisht pasi shpalli një emergjencë kombëtare për shkak të hyrjes së fentanylit në SHBA. Përfaqësuesi Amerikan i Tregtisë, Jamieson Greer, i cili foli krah Bessent, tha se diskutimet mbi frenimin e këtij opioidi vdekjeprurës ishin “shumë konstruktive”, edhe pse zhvilloheshin në një pistë të veçantë.
Reuters
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
